ШӨХТГ-т  иргэдээс ирүүлсэн гомдлын дагуу зах зээлд тэмээний ноос, сарлагийн хөөвөр гэсэн шошготойгоор нийлүүлэгдэж байгаа зарим ноосон нэхмэл бүтээгдэхүүн нь чанарын шаардлагыг хангаж байгаа эсэхийг нэлээн хэдэн сарын өмнө  шалгасан. Тэгвэл хүйтний улирал эхэлсэн яг энэ үед бас хуурамч, шаардлага хангаагүй тэмээний ноос, сарлагийн хөөвөр, ноолуур гарч ирдэг.

 Тэгвэл ШӨХТГ-ын хяналтын байцаагчаас энэ тал дээр хяналт тавьж байгаа эсэхийг лавлахад “Түрүүчийн удаа цөөнгүй зөрчил дутагдал хаяг, шошгоны тал дээр гаргасан. Тэдгээр зөрчлийг арилгахын үүрэгдэж, тухайн үед таван газрын торгож байсан. Харин одоо яг сезоны үе болохоор дахин хяналт тавина.Өнөөдрийн байдлаар ноолууран бүтээгдэхүүн дээр гомдол ирээд шалгаж байгаа. Шалгалтын ажиллагаа дууссаны дараа эргэн мэдээлнэ.” гэв.

Тэгвэл ШӨХТГ-аас шалгасан “Тод оймс”, “Янмал”, "Мон­гол оймс" зэрэг таван газруудад илэрсэн зөрчлийн талаар дор дурдая.

Шалгалтын явцад илэрсэн зөрчил: Хяналт шалгалтанд хамрагдсан нэр бүхий 5 компанийн үйлдвэрлэж буй 18 нэр төрлийн оймсыг сорилт шинжилгээнд хамруулахад 13 нэр төрлийн дээжийн 11-ийнх нь орсон материалын ширхэгийн бүрэлдэхүүн уг бүтээгдэхүүний шошгон дээр буй найрлагаас огт өөр, тухайлбал 100 хувь тэмээний ноос, сарлагийн хөөвөр байхаар шошгон дээрээ заасан боловч 45,0-92,5% нь тэмээний ноос, сарлагийн хөөвөртэй ижил өнгөөр будсан хонины ноос, 55,0-7,5 хувь нь вискоз буюу химийн аргаар гаргаж боловсруулсан болох нь сорилтын дүнгээр тогтоогдсон. Энэ нь "Өрсөлдөөний тухай" хуулийн 12.1.2-т заасан "өөрийн бараа бүтээгдэхүүний талаар худал, зөрүүтэй мэдээлэх, эсхүл үнэн байдлыг гуйвуулах зэргээр бусдыг төөрөгдүүлэх", "Хэрэглэгчийн эрхийг хамгаалах тухай" хуулийн 12.8-д заасан "Үйлдвэрлэгч, худалдагч гүйцэтгэгчээс хэрэглэгчид бараа, ажил, үйлчилгээтэй холбоотой худал мэдээлэл өгөхийг хориглоно." гэж заасан заалтуудыг тус тус зөрчсөн байна.

Ингээд ШӨХТГ-аас зөрчил гаргасан аж ахуйн нэгжүүдэд Өрсөлдөөний тухай хуулийн 27.1.3-т "Энэ хуулийн 12.1-д заасныг зөрчсөн аж ахуй эрхлэгчийг 10 000 000 хүртэл төгрөгөөр торгох, хууль бусаар олсон орлого, эд зүйлийг хураах" гэж заасны дагуу захиргааны хариуцлага ногдуулж, улсын байцаагчийн албан шаардлага хүргүүлэн зөрчлийг арилгуулсан байна. Ингэснээр хэрэглэгчийг төөрөгдүүлсэн хаяг шошгыг үнэн бодит мэдээллийг агуулсан шошгоор сольж, хэрэглэгчийн бараа бүтээгдэхүүний зөв сонголт хийх эрхийг хамгаалжээ.