Ерөнхийлөгч асан Н.Энхбаярыг “Өргөө” зочид буудал болон “Улаанбаатар Таймс” сонины хотын “А” зэрэглэлд байдаг байрыг хууль бусаар авсан гэж 2,6 жилийн ял оноосон билээ. “Улаанбаатар Таймс” сонины эрхлэгч байсан, менежментийн багийн ахлагч До.Чулуунбаатар нарыг ч энэ хэргээр шалгаж, 2-3 жилийн ял оноосон. Тэгвэл өмнө нь хоёр ч удаа хувьчлагдаад хотын захиргаанд эргэж очоод буй “Улаанбаатар Таймс” сонины байрыг ирэх онд дахин хувьчлахаар жагсаалтанд оруулсан байна.

   Энэ барилгын хувьчлал Нийслэлийн Засаг даргаар М.Энхболд ажиллаж байх үед эхэлж, Ц.Батбаяр, С.Билэгт, Ц.Мөнхбаяр, Э.Бат-Үүл гэсэн таван засаг даргын нүүрийг үзлээ.

   Анх Хэвлэлийн эрх чөлөөний тухай хууль гарсны дараа дотор нь ажиллаж байсан сэтгүүлчдэд "Улаанбаатар Таймс" сониныг эд хөрөнгөтэй нь хувьчилсан байдаг. Тэр үед “Хангарьд” компанийн захирал Л.Сэргэлэн гэгч тус барилгыг олон давхар зочид буудал болгохоор хөрөнгө оруулсан ч “шаардлага хангахгүй, олон давхарлаж барих боломжгүй” гэсэн дүгнэлт гарснаар барилгыг нурсан чигт нь орхисон нь өдгөө ийнхүү Төрийн ордны хажууд “сүнстэй байшин” шиг харагдах болоод байгаа юм. Байшин ийнхүү "дутуу" болж, "Улаанбаатар Таймс"-ынхан байргүй болсон тул асуудал үүсч, шүүх хурлаар нийслэл өмчдөө буцаан авч байж. Хоёр дахь удаагаа хувьчлахад сэтгүүлч Д.Чулуунбаатар менежментийн асуудлыг хариуцаж, “Медиа холдинг” компаниас 370 орчим сая төгрөгийг цөөнхийн хувьцаагаа барьцаалан босгосон байна. Өөрөөр хэлбэл дахин хувьчлахад 2011 оны байдлаар Д.Чулуунбаатар 33 орчим хувьтай, хуульч Гансүх, сэтгүүлч С.Баярмөнх, социологич О.Алтан нар тус бүр 6-7 орчим хувьтай болж, “Медиа холдинг” компани олгосон зээл, гаргасан зардал, босгосон хөрөнгийн хариуд 49 хувьтай болсон байжээ.
 
  Гэтэл дахин хэрэг мандаж 2012 онд энэ барилгыг хууль бусаар авсан гэж Ерөнхийлгч асан Н.Энхбаярыг холбогдуулан шалгаж эхэлсэн билээ. Н.Энхбаярыг 2.1 тэрбум төгрөгийн өртөгтэй "Улаанбаатар таймс" сонины байрыг 369.7 сая төгрөгөөрмаш хямд худалдан авсан гэж буруутгасан юм. Түүнийг “Улаанбаатар Таймс” сонины барилгыг эзэмшдэг гэх албан ёсны бичиг баримт байдаггүй ч шүүх хуралдаанаар цөөнгүй гэрч гэрчилсэн гэдэг бүдэг, бадагхан түүх бий. Н.Энхбаярын өмгөөлөгч “УБ таймс сониныг хувьчлахад хөрөнгө гаргаж байсан HT холдинг компани нь сүүлд Н.Энхбаярын төрийн албаа өгсний дараа байгуулагдсан “Crop” компанитай нийлсэн” тул хэлмэгдүүлж байна гэж мэдэгдэж байсан юм.

   Харин одоо Төрийн ордны хажууд нүд үзүүрлэгдэн, нурсан балгасаараа дуудуулдаг, нэлээн олон хүнийг “аав”-ын хаалга татахад хүргээд буй “Улаанбаатар Таймс”-ыг хэн хувьчилж авах бол гэдэг сонирхол татаж эхэллээ. Эх сурвалжийн мэдээлж байгаагаар ирээдүйд асар их ашиг авчрах боломжтой энэ газрыг эрх баригч АН-ынхан хувьчилж авахаар ярьж байгаа гэх. Н.Энхбаярыг шүүх хурлын үер тус барилгыг 2,1 тэрбум төгрөгөөр үнэлсэн байдаг. Харин одоо газрын үнэ өссөн учир үүнээс илүү өртөгөөр хувьчилах нь тодорхой.