Хурд хамтлагийнхан урлагт 20 жил зүтгэснийхээ баярын тоглолт өнөөдөр, маргааш хоёр өдөр “Улаанбаатар палас”-ын концертын их танхимд болно.

Энэхүү тоглолтонд Хурд хамтлагийнхан өмнөх тоглолтуудаас илүү ач холбогдол өгч байгаа бөгөөд уг баярыг утга учиртай, дурсах зүйлтэй тэмдэглэхээр шийдсэн гэдгээ ч илэрхийлж байсан.

Тэд ойн баярын тоглолтынхоо хүрээнд хамтлагийнхаа алтан пянзийг Холливүүдэд хэвлүүлээд байгаа билээ. Дэлхийн нэр хүнд бүхий студид хэвлүүлсэн тус пянзийг тэд 20 жилийнхээ ойн баярт л зориулж гаргажээ. Алтан пянзийг тэр бүр хамтлаг, дуучид хэвлүүлээд байдаггүй бөгөөд тодорхой шалгуурт тэнцсэн хамтлаг, дуучид л хэвлүүлэх эрхтэй болдог байна. Алтан пянзад Хурд хамтлагийн 20 жилийн уран бүтээл багтсан байна. Мөн хамтлагийн ахлагч Ганбаярын гарын үсэгтэй бөмбөрийн цохиур, “Хурд” нэрийн гитар, хүзүүний зүүлт, бугуйвч, хуанли, шинэ CD зэргийг худалдаанд гаргасан байна. Тус бүтээлүүд нь цөөхөн хувь хэвлэгдсэн гэнэ.

 Монголын хөгжим, сонирхогч, дурлагчид өмнө нь гадаадын хамтлаг дуучдын “Алтан пянз”, сувинерыг шүтэн дурсгал болгон хадгалж, хэрэглэдэг байсан бол өнөөдрөөс эхлэн “Хурд”-ын 20 жилийн ойдоо зориулан урлуулсан эдгээр зүйлсээр цуглуулгаа баяжуулах боломжтой болж байна.