МИАТ-ийн зарим удирдлагад холбогдох мөнгө угаасан гэх дуулиант хэргийг гурван шатны шүүхээр шийдвэрлээд гаргасан хариу нь олныг гайхшруулаад байгаа. Анхан болон давж заалдах шатны шүүхээс  мөнгө угаасан болох нь тогтоогдож 10-13 жилийн хорих ял сонсоод байсан МИАТ-ийнхан ,  албан үүрэгтээ хайнга хандсан төдий гэм буруутай  болж үлдсэн. Улмаар  Ч.Хоролсүрэнгийн дүү Ч.Суурьтогтохын хэргийг ч г хэрэгсэхгүй болгосон юм.  Ийн МИАТ-ийнханы сүр дуулиантай эхэлж байсан хэрэг эцсийн мөчдөө яагаад ингэж өнгөрөх болов.  Түмний нүдэн дээр шийдэгдсэн  эл хэргийг авлига, мөнгө угаасан хэрэг гэж хууль шүүхийнхэн өөрсдөө харуулсан ч эцэстээ хоорондоо зөрчилдөж албан тушаалдаа хайнга хандсан төдий болгосон нь ямар учиртай юм болоо. Магадгүй Ц.Оюунгэрэл сайдын нөлөөлөл  энэ хэрэг дээр харагдсан уу. Тэрбээр санасандаа хүрч МИАТ-ийн хэргийг хөнгөрүүлэхэд нэмэр дөхөм болов уу гэсэн таамаг олны дунд байгаа. Тэгвэл Ц.Оюунгэрэл сайдад ялагдсан Х. Тэмүүжин сайд МИАТ-ынханы шүүхийн шийдвэр ихэд сэтгэл дундуур байгаагаа хэллээ. Тэрбээр “Хамгийн өндөр ялтай мөнгө угаасан зүйл ангийг нь алга болгочихвол болох гээд байна гэсэн байр суурьтай хүмүүс байсан. Тэд хүслээ биелүүлсэн юм шиг байна. Энэ хэргийг илрүүлэх гэж ажилласан маш олон мөрдөгч, прокурор болоод шударгаар шийдвэрлэх гэж хүчин чармайлт гаргасан анхан болон давж заалдах шатны шүүгчдийн ажлыг Дээд шүүхийн шүүгчид алга урвуулахын төдий эргүүлчихэж байгаа нь харамсалтай. Ер нь бол шүүгчид шийдвэрийнхээ үндэслэлийг дэлгэрэнгүй бичдэг болохгүй бол хамтын шийдвэрийн ард нуугдаад хариуцлага хүлээхгүй хоцордог” гэв.