Чингэлтэй дүүргийн замын цагдаагийн тасгийн алба хаагчид "Тоёото" маркийн автомашиныг зогсооход тухайн тээврийн хэрэгслийн жолоодож явсан Н.Даваадорж гэгч нь хуурамч жолооны үнэмлэх ашиглаж явсаныг нь илрүүлэн Чингэлтэй дүүргийн цагдаагийн хэлтэс шалгаж байна. Мөн Хан-Уул дүүргийн замын цагдаагийн тасгийн алба хаагчид "Хюнда" маркийн автомашиныг зогсоон шалгахад  гарал үүслийн бичиггүй 3 тонн үхрийн мах тээвэрлэж явсныг нь Хан-Уул дүүргийн цагдаагийн нэгдүгээр хэлтэс шалгаж байна. Түүнчлэн Баянзүрх дүүргийн замын цагдаагийн алба хаагчид "Хюнда" маркийн автомашиныг зогсоон шалгахад тухайн тээврийн хэрэгслийг жолоодож явсан Цогтгэрэл гэгч гарал үүслийн бичиггүй 200 шуудай мод тээвэрлэж явсаныг нь Баянзүрх дүүргийн цагдаагийн нэгдүгээр хэлтэс шалгаж байна.

Тэгвэл дээрх зөрчлүүдийг гаргасан тохиолдолд ямар хариуцлага тооцдогийг Цагдаагийн ерөнхий газрын хэвлэл мэдээллийн ахлах байцаагч, цагдаагийн ахмад Ё.Лхагвасүрэнгээс тодрууллаа.

-Гарал үүслийн бичиггүй мод тээвэрлэж явах тохиолдлууд маш ихээр гарч байна. Энэ хэрэгт ямар хариуцлага тооцдог вэ?
-Өмнө нь модны гарал үүслийн бичгийг цагдаагийн байгууллагаас тухайн иргэнийг шалгаж байхад ч араас нь хэн нэгэн авчирч өгч болдог байсан. Тодруулбал, гарал үүслийн бичигтэй холбоотой нарийвчилсан журам байхгүй байсан юм. Өөрөөр хэлбэл, хулгайн мод авч яваад баригдах юм бол хойноосоо гарал үүслийн бичиг авчруулж болдог байсан. Харин  энэ зун Байгаль орчин, ногоон хөгжлийн яам, ЦЕГ, УМБГ-ын дарга нар хамтарсан журам шинээр батлаж модны гарал үүслийн бичгийг шинэчилсэн. Үүнд, гарал үүслийн бичиг заавал машинтайгаа хамт буюу цонхон дээр нь ил явсан тохиолдолд хүчинтэй гэж заасан. Машиныхаа дотор хадгалсан болоод араас нь авчирж өгсөн гээд аль тохиолдолд гарал үүслийн бичиг хүчингүй болж хулгайн, хууль бусны мод хэмээн арга хэмжээ авагдана. Улмаар тухайн этгээд байгаль орчинд учруулсан хохирлын үнэлгээ зэрэг нь хуульд заасны дагуу шалгагдаад явдаг.

-Махны хулгайн хувьд ижил үү?
-Мах ачиж яваа хүн гарал үүслийн бичиг заавал авч явах ёстой. Махны гарал үүслийн бичгийг цагдаагийн байгууллагаас шалгах зайлшгүй шаардлагатай байдаг учир бичиггүй тохиолдолд мөрдөн байцаалтыг явуулна.