Татварын байгууллагын хууль бус томилгоо, Үндсэн хуулийн Цэц болон дээд шүүхийн хууль бус шийдвэрийн талаар Баянзүрх, Налайх дүүргийн татварын хэлтсийн даргаар ажиллаж байсан иргэн Н.Энхээ өнөөдөр сэтгүүлчдэд мэдээлэл хийлээ.

Түүнийг одоогоос гурван жилийн өмнө Баянзүрх дүүргийн татварын газар хэлтсийн даргын алба хашиж байх хугацаанд “Төрийн байгууллагын хэвийн үйл ажиллагааг алдагдуулан, ёс зүйн ноцтой зөрчил дахин давтан гаргаж, улмаар ажил хаян Монгол Улсын Төрийн албаны тухай хуулийн 13 дугаар зүйл,  заалтыг зөрчсөн” гэдэг үндэслэлээр ажлаас нь халж Чингэлтэй дүүргийн шүүхэд эрүүгийн хэрэг үүсгэн шалгаж эхэлсэн юм байна. Тэгвэл энэ үеэр түүнээс Татварын байгууллагын хууль бус томилгоо, Үндсэн хуулийн Цэц болон дээд шүүхийн хууль бус шийдвэр гэж чухам юуг хэлээд байгааг асууж тодрууллаа.

-Баянзүрх, Налайхад ажиллаж байсан гэсэн үү?
-Баянзүрх дүүргийн татварын хэлтсийн даргаар найман жил ажилласан. Улмаар Налайхад ажиллаж байгаад 2010 онд халагдсан.

-Таньд эрүүгийн хэрэг үүсгэсэн гэсэн үү?
 -Татварын ерөнхий газрын үүрэг гүйцэтгэгчээр томилогдсон  Ц.Оюунбаатарын талаарх гомдлыг Үндсэн хуулийн цэцэд 27-ний өдөр гомдол гаргаад 30-нд халагдсан. Өөрөөр хэлбэл татварын улсын байцаагчийн эрхгүй, хөдөлмөрийн хууль зөрчиж татварын газрын зарим ажилтныг ажлаас халсан хэмээн үзэж, Төрийн албаны зөвлөлд гомдол гаргасан юм. Түүний дараа Үндсэн хуулийн Цэцэд Ц.Оюунбаатарыг даргаар томилсон шийдвэрийг хууль бус гэж үзэж өргөдөл гаргасан. Гэтэл түүнээс хойш гурав хоногийн дараа намайг Налайх дүүргийн татварын хэлтсийн даргын албанаас үндэслэлгүй чөлөөлсөн. Үндсэн хуулийн цэцэд хандаад гуравхан хоносны дараа ийн шийдвэр гаргасан нь та бүхэнд нэгийг бодогдуулах биз.

-Чухам ямар учраас та Ц.Оюунбаатарыг даргаар томилсон шийдвэрийг хууль бус гэж үзсэн бэ?
- Учир нь би Ц.Оюунбаатар болон татварын олон булхайг мэддэг байсан.  Тухайлбал, Баянзүрх дүүргийн Засаг дарга асан Б.Батзориг 2009 оны зургаадугаар сард “Кёкүшюзан хөгжил сан”-гийн 790 сая төгрөгийн татварын өрийг Захиргааны хэргийн шүүхийн шийдвэрийг хууль бусаар үйлдүүлж, цуцалсан асуудлыг баримт, нотолгоотой нь мэднэ. Тодруулбал, гурван шатны шүүхийн шийдвэртэй, шүүхийн шийдвэр гүйцэтгэх хуудастай, татварын өршөөлийн хуулинд хамрагдах ямар ч боломжгүй өрийг захиргааны хэргийн анхан шатны шүүхээр шийдвэр гаргуулаад цуцалсан. Өөрөөр хэлбэл, тэр хуулинд нөхөөд хамруулчихсан гэсэн үг. Үүнийг нь би нийслэлийн прокурорт өгөөд АТГ-т эрүү үүссэн. Үүнээс болж намайг ажлаас ор үндэслэлгүй шалтгаанаар халсан. Мөн энэ хэргийн ард тухайн үеийн МАН-ын ЕНБ-ийн дарга У.Хүрэлсүхийн хуулийн зөвлөх Я.Төмөрбаатар, Баянзүрх дүүргийн Засаг дарга асан Б.Батзориг нар байсан учир хэргийг хэрэгсэхгүй болгосон. Би энэ асуудлын араас гурван жил явж байна. Ингээд бодохоор Татварын байгууллагын хууль бус томилгоогоор томилогдсон эрхэм Үндсэн хуулийн Цэц болон шат шатны шүүхийг өөртөө урвуулж, хуулийг хүчгүйдүүлж байна.

-Энэ мэтээрээ хууль бус байдал үргэлжилвэл та дараагийн удаа ямар арга хэмжээ авах вэ?
-Өлсгөлөн, суулт зарлана.