УИХ-ын гишүүн Ж.Батзандан саяхан “Соёлын өвөө гадаад нөхөртэй хүнд хадгалуулахгүй”, “гадаад эхнэр, нөхөртэй хүнийг төрийн өндөр албан тушаалд ажиллуулахгүй” гэх мэт агуулгатай асуудлыг хөндсөн нь ихээхэн дуулиан болсон. Хамгийн гол нь Ж.Батзандангийн энэхүү байр суурь сайд Спорт, соёл аялал жуулчлалын сайд Ц.Оюунгэрэлийг ихээхэн эмзэглүүлэх болсон талаар эх сурвалж мэдээллээ. Тийм ч учраас сайд Ц.Оюунгэрэл өөрийн твиттер хуудсандаа “Монголын их хатдын нууц товчоо гэдэг номыг уншвал гадаад бодлого Ж.Батзандангийнхаас бүр тэс өөр байсан гэдэг нь ойлгогдоно” хэмээн бичиж үлдээсэн юм.
    Харин Ц.Оюунгэрэлийн байр суурийг уншсан хүмүүс “гадаад хүний бичсэн номоор гадаад бодлого ярьж болохгүй”, “Монголын их хатдын нууц товчоо” гэж зохиолын номыг үнэн баримтат гэж ойлгож болохгүй. Ж.Батзандангийн хэлсэн үгэнд эмзэглээд яахав. Гадаад нөхрийн сэтгэлийг татаж чадвал дотоод муу нөхрөөс илүү Монголд хайртай болно”, “Эхнэр нөхрийн асуудал ярьж байхаар бодлогын асуудал хэлэлцээч” гэх мэт үй түмэн санал сэтгэгдэлийг дагуулсан юм.

    Эх сурвалжийн мэдээлж байгаагаар бол америк нөхөртэй Ц.Оюунгэрэл сайд америк зохиолч Жак Уэтерфордын бичсэн “Монголын Их хатдын Нууц Товчоо” хэмээх номыг Ж.Батзандан гишүүнд шинэ жилийн бэлэг болгон илгээхээр бэлтгэж байгаа гэнэ. Учир нь түүнийг энэ номыг уншин гэгээрч, гадаад бодлогын талаарх ойлголтоо өөрчлөхийг зөвлөх аж. Бас гадаад эхнэр, нөхөртэй гэж хүнийг ад үзэх хэрэггүйг ч соёлтойгоор сануулах бололтой.
Ийнхүү Соёлын сайдын сонирхолтой бэлэг УИХ-ын гишүүн Ж.Батзанданд таалагдах эсэхийг шинэ жилийн дараа мэдэж болох юм. Бас гадаад эхнэр, нөхөртэй улс төрчдийг төрд зүтгэх хэрэггүй хэмээх байр суурь нь энэ номыг уншаад хэрхэн өөрчлөгдөхийг асуух гэсэн хүмүүсийн тоо ч нэмэгдэхээр болов.

    Жак Уэтерфорд “Монголын их хатдын нууц товчоо” хэмээх номоо Монголын эхчүүд, эмэгтэйчүүдэд зориулсан бөгөөд “Мөнх Хөх Тэнгэрийн Алтан Наран Их Монгол Үндэстний эхчүүд, охидыг үүрд мөнхөд ивээх болтугай” хэмээн эхлүүлсэн байдаг. Уг бүтээл нь  Чингэс хааны хэлсэн “Охин урагтаа соёрхол өгье” гэсэн үгэн дээр тулгуурлан бичигдсэн юм. Мөн их Монгол Улсын мандрал бадралд гадаад нөхөртэй эмэгтэйчүүдийн үүрэг оролцоо их байсныг чухалчилан өгүүлсэн. Жак Уэтерфордын уг бүтээлээс монголчууд эзэнт гүрнийхээ үеэс эмэгтэй хүнийг хэрхэн өргөмжилж чаддаг байсныг, эмэгтэйчүүдэд Чингис хаандаа хэрхэн гүн хүндэтгэлтэй ханддаг байсныг харж болно. Түүнээс гадна монголчуудын эхнэр болон охид нь дайны үед өрх гэрээ төдийгүй улс орноо авч явдаг тухай олон баримтаар өгүүлсэн байдаг юм.
    Ийм нэгэн ном шинэ жилийн бэлэг болон сайдаас гишүүнд очихоор боллоо.