Ажил үүргээ гүйцэтгэж яваад алтан амиа алдана гэдэг үнэхээр харамсалтай. Тэр дундаа манай хууль цагдаагийн байгууллагынхан хийгээд  сэтгүүлчид ажил үүргээ биелүүлж яваад амь насаа алдах тохиолдол их гардаг.  Хэн нэгэн өс хонзон санаж санаатайгаар амь насыг нь бүрэлгэх аль эсвэл албан тушаалынхаа дагуу шаардлага тавихад хүлээж авахгүй эсэргүүцэж халдах,  үгүй бол ажлаа гүйцэтгэж яваад бусдын гарт амиа алддаг. Тэгвэл уржигдархан л гэхэд Шүүхийн шийдвэр гүйцэтгэгч бусдын гарт амиа алдсан харамсалтай хэрэг гарлаа.  Өмнө нь ч хууль цагдаагийн байгууллагын ажилчид ажил үүргээ гүйцэтгэж яваад амь насаа алдаж байсан хэд хэдэн хэргүүд гарч байсан.  Ингээд сүүлийн саруудад гарсан хууль, цагдаагийнхантай холбогдсон хүн амины хэргүүдийн тоймыг хүргэж байна.

Шүүхийн шийдвэр гүйцэтгэх ерөнхий газрын харьяа Сүхбаатар аймаг дахь Шийдвэр гүйцэтгэх албаны шийдвэр гүйцэтгэгч В.Сүхбат нь албан үүргээ гүйцэтгэж явахад нь буудан амь насыг нь хөнөөсөн хэрэг уржигдар гарсан.  

Сүхбаатар аймгийн Сум дундын шүүхийн шийдвэр, гүйцэтгэх хуудсаар Сүхбаатар аймгийн Баруун-Урт сумын иргэн Б.Эрдэнэсүхээс хүүхдийн тэтгэлэг болон 88 толгой малыг Д.Отгонзаяад олгохоор шийдвэрлэсний дагуу шийдвэр гүйцэтгэлийн ажиллагаа явуулахаар тус албаны ахлах шийдвэр гүйцэтгэгч ахмад Ц.Аваасүрэн шийдвэр гүйцэтгэгч В.Сүхбатын хамтаар өчигдөр Сүхбаатар аймгийн Баруун урт хотоос 80 километрийн зайд байрлах Мөнххаан сумын нутаг Тэрэм гэх газарт оршин суугч Б.Эрдэнэсүхийн гэр рүү нь очиж, шийдвэр гүйцэтгэх ажиллагаа явуулжээ.

Энэ үед Б.Эрдэнэсүх нь шийдвэр гүйцэтгэгч В.Сүхбатыг буудаж амь насыг нь хохироогоод тухайн үед хамт явсан төлбөр авагч талын таван хүн дээр очин иргэн н.Батсайханыг газар дээр нь буудан амь насыг нь хохироож, мөн иргэн н.Батсүхийн мөрөн тус газарт нь буудан шархдуулсан юм.  Тэгвэл гэмт этгээд хэрэг гарсаны дараа алга болсон байсан ч өчигдөр 12.00 цагийн үед хэрэг гарсан газрын 10 км-ийн зайгаас цогцсыг нь олсон юм. Харин эхнэрээс нь одоогоор байцаалт авч байгаа юм.  

Ховд аймгийн Булган сумын Бүрэн хайрхан багт дэд ахлагч Б.Төмөрчөдөр эргүүл хийж явах үед “Бүрэн” авто сэлбэгийн дэлгүүрийн нэг цоож нь эвдэрсэн, нэгийнх нь цүүц нь эвдэрсэн байдалтай байгааг олж харжээ.

Ингээд цагдаагийн тасаг руу утасдаж хулгай орсон байж магадгүй хэмээн мэдэгджээ. Дуудлагын дагуу гурван албан хаагч ирснээр дэлгүүр лүү ороход харанхуй ямар нэгэн чимээ гараагүй байна. Гэтэл гэнэт буун дуу гарч дэд ахлагч Б.Төмөрчөдөр шууд лангуун дээр унажээ.

Цагдаа нар шархдсан залууг аваад дэлгүүрээс гарчээ. Зэвсэглэсэн этгээдүүд хаалга чөлөөлөхийг шаардаж, тэгэхгүй бол буудна хэмээн заналхийлсэн  ч цагдаа нар дэлгүүрийн үүднээс холдоогүй байна. Гэмт этгээдүүд дэлгүүрийн цонхоор гарч зугатсан бөгөөд цагдаа нарын мэдээлснээр гурвуулаа байсан аж. Шархдсан залууг эмнэлэгт хүргэх замд нас барсан байна. Талийгаач залуугийн хувьд дөнгөж хорьхон настай төдийгүй ээж, дүүгийн хамт гурвуулаа амьдардаг байжээ.

Харин гэмт этгээдүүдийг Булган сумын Баянсудал багт оршин суудаг 17-19 насны К.Хапар, К.Сапаргалы, Х.Сайбаш нар гэдгийг төд удалгүй тогтоосон. Тэднийг  гэртээ нуугдсан байхад нь баривчилсан.  Улмаар Эрүүгийн хуулийн 91-р зүйлийн 91.2-т зааснаар бусдын амийг санаатай хохироосон хэмээн эрүүгийн хэрэг үүсгэн шалгах явцад гэмт этгээдүүд долоон удаагийн үйлдлээр хулгайн гэмт хэрэг үйлдсэн болохыг мөн тогтоожээ.  Тэдний үйлдсэн хүн амины хэрэгт нь Эрүүгийн хуулийн 91.2, 91.2.6, 91.2.8, 91.2.11-р зүйл анги, хулгайн гэмт хэрэгт нь 145.3-р зүйлд зааснаар ял оноосон юм.

Цэргийн дарга Н.Буянжаргал гэгч өмгөөлөгч Н-ийн аминд хүрсэн  хэрэг гарч, олныг цочирдуулсан. Тодруулбал, Завхан аймгийн Улиастай хотод наймдугаар сарын 2-3-нд шилжих шөнө цэргийн дарга Н.Буянжаргал өмгөөлөгч Н-ийг амь насыг нь хохироосон  хэрэгт татагдсан юм.  Улмаар хэргийг үйлдэгч этгээд тухайн өмгөөлөгчийн байрласан зочид буудлын бичлэгийг устгана хэмээн сүрдүүлсэн байдаг.
Юутай ч талийгаач  Н.Болорчулуунтай хурандаа Н.Буянжаргалын эхнэр ажил хэргийн шугамаар түүний байрлаж буй “Уран байгаль” зочид буудалд уулзаж байжээ. Тодруулбал, Н.Болорчулуун нь энэ сарын 3-нд болох Х.Амартүвшин, Л.Доржбал нарын хэрэгт өмгөөлөл үзүүлэхээр Говь-Алтай аймгаас ирээд байсан аж. Х.Амартүвшин, Л.Доржбал нар нь Эрүүгийн хуулийн 91.2.2 буюу хүнийг санаатай алах, 181.3 буюу танхайрах, 254.2 буюу худал мэдүүлэг өгсөн хэрэгт буруутгагдан шүүгдэх гэж байжээ. Тодруулбал, хурандаагийн эхнэр Д-гийн төрсөн дүү нь энэхүү хүн амины хэрэгт буруутгагдсан учраас талийгаач Н.Болорчулуун өмгөөлөл үзүүлж, шүүх хуралд нь оролцохоор ирсэн байна. Тиймээс хурандаагийн эхнэр Д дүүгийнхээ хэргээр өмгөөлөгч Н.Болорчулуунтай уулзаж байсан байдаг. Гэвч хурандаа Н.Буянжаргал эхнэрээ талийгаачтай хардсанаас ийнхүү хүний амь насанд хүрсэн хэрэгт сэжигтнээр татагдсан юм.

Наймдугаар сарын 13-ны өдөр Шүүхийн шийдвэр гүйцэтгэгч амиа хорлосон хэрэг гарсан. Мэдээллийг тодруулбал, Налайх дүүргийн Шүүхийн шийдвэр гүйцэтгэгч О хэмээх эмэгтэй өөрийгөө боож, амиа егүүтгэсэн юм.  
Тухайн үед цагдаагийн алба хаагчид хэргийн газарт очиж,  шалгалт хийн амиа хорлосон болохыг нь тогтоожээ. Гэхдээ талийгаачийн гэр бүл үүнтэй санал нийлэхгүй байна.
Гэтэл ар гэрийнхэн нь талийгаачийг амиа хорлох хүн биш гэдэгт санал нэгдэж, талийгаачийг бусдын гарт өртөж, нас барсан гэсэн аж. Учир нь  талийгаач өмнө нь ажил дээр нь ямар нэгэн зүйл болж, бүтэхгүй байгаа  талаар ярьдаг байжээ. Мөн хэн нэгэн даргын дарамт байгааг ярьж байсан гэнэ.

Ямартаа ч шүүхийн шийдвэр гүйцэтгэгч эл эмэгтэйг бусдын гарт амиа алдсан хэмээн ар гэрийнхэн нь үзэж байгаа талаар эх сурвалжууд мэдээлж байсан билээ.

Энэ мэт хууль сахиулагчид маань ажил үүргээ гүйцэтгэж яваад амиа алдах тохиолдлууд гарсаар байна. Мөн бусдад зодуулах, сүрдүүлгэнд автах зэрэг янз бүрийн зөрчилтэй тулгардаг нь нууц биш юм.