Өчигдөр цахим орчин дахь хамгийн халуухан сэдэв яах аргагүй Төрийн соёрхолт дуучин Д.Болдын "Хулгайн хэрэг" байлаа. 

Чухам яагаад ийм хэрэг мандсаныг товчхон тайлбарлавал тэрээр өнгөрсөн амралтын өдрүүдэд болсон “UBS music awards” наадмаас “Би дурламаар байна” клипээрээ хоёр ч шагнал хүртээд буй. Гэтэл “Шилдэг график дизайнтай клип” номинацид шилдгээр шалгарсан уг бүтээл хулгайнх болох нь батлагдаж Төрийн соёрхолт дуучинг маань нэлээдгүй сандаргаад байна.

Урлагийн тогоонд цавуу болтлоо чанагдсан дуучин Д.Болд арван хэдхэн насандаа л "Камертон"-оор овоглож монголын рок попын түүхэнд өөрсдийн гэсэн түүхийг бичилцэж эхэлсэн. Улмаар соло карьер хөөж “Хайрын хүч”, “440 герц” "Монгол поп" цомгуудаа гаргасан нь түүнд нэр алдрыг авчраад зогсохгүй хэл ам дагуулсан Төрийн соёрхолтыг ч өгүүлсэн.

Цол гуншинг нь дуудахад мөр дүүрэхээр ийм хүндтэй дуучин нь хулгайн дуу хийнэ гэхээр олон хүний санаанд багтаагүй бололтой.  Энэ явдалд дургүйцсэн зарим нь Д.Болдыг тайлбар хийгээд зогсохгүй энэ клипээрээ авсан шагналаа буцааж, ард олноос уучлал гуйх ёстой ч гэцгээж байв.

Энэ бүхний хариуд тэрбээр өөрийн твиттер хуудсаараа дамжуулан “Энэ клипийг "DOZ entertainment" 15 сая төгрөгөөр хийж гүйцэтгэсэн. Бас найруулагчаар нь Доржсүрэн ажилласан. Уучлалтыг би биш надаас мөнгө авч хийсэн ДОЗ-ынхон л гуйх ёстой" гэжээ. Түүнчлэн шагналаа буцааж өгөхийн тухайд "Хөөрхий дөө. Энэ шагналыг нь буцааж өгсөн ч яалаа, байсан ч яалаа. Бидэнд үр өгөөжөө өгөөд байгаа тийм зүйл биш шүү" гэсэн тайлбарыг хийсэн юм.
 
Санаа хулгайлсан асуудал эцэстээ найруулагч н.Доржсүрэн дээр унасан ч уран бүтээлч хүн өөрийнхөө клипыг бараг хараагүй сонсоогүй мэтээр тайлбарласан нь олны гайхлыг төрүүлж, манай уран бүтээлчдийн хийж байгаа нь ч,  хийлгүүлж байгаа нь ч тэр  ажилдаа яаж ханддагийг батлаад өгөв. Тиймдээ ч нэгэн жиргээч "Урлагаар зөв үлгэр үзүүлсэн гэж Төрийн шагнал төрөөс олгосон байх шүү. Бусдаас илүү хариуцлагтай бай" хэмээн сургаад авсан бол манайдаа л олны танил "Херо"-гийн н.Баатар "Ийм клип тодруулсан тэр шүүгчдийн л буруу шүү дээ. Бид бүх зүйл дээр мэргэжлийн хандах цаг болжээ" хэмээн зохион байгуулагч талыг шүүмжлэх, сэрэмжлэхийн завсарт голыг нь олоод хэлчихэв. Үнэхээр ч “UBS Music Video Awards-2013” наадмын шүүгчид санаа хулгайлсан клипэнд шагнал хүртээснээрээ хэр мэргэжлийн хүмүүс вэ гэдгээ нотлоод өгч байгаа юм.

Д.Болдын хувьд дуучин Агиймаатай хамтран дуулсан "Хайрлах хүсэл" дуугаараа урьд нь "хулгайч" нэрийг зүүж явсан туршлагатай ийнхүү дахин "хулгайч" нэрийг зүүхэд хүрээд байгаа нь түүний нэр хүнд, цаашлаад төрийн соёрхолт гэдэг эрхэм хүндтэй шагналыг шороо тоостой нь хутгасан хэрэг боллоо. За ямартай ч хэн хэндээ сургамжтай энэ үйл явдлаас уран бүтээлчид нэгийг бодож хоёрыг тунгаана биз. МУУ ЮМ МОДОН УЛААТАЙ ГЭЖ...

Youtube-д тавигдсан бичлэг: