Говь-Алтай аймгийн Цээл сумын нутагт үйл ажиллагаа явуулж, байгаль орчин, хүн малын эрүүл мэндэд хохирол учруулдаг хэмээн хэл ам  татлаад байдаг  “Алтайн хүдэр” компанийн Таян нуурын уурхайд өнгөрсөн долоо хоногийн сүүлчээр осол гарч, хүн нас барсан байна.  Ямартаа ч хэргийн талаар Цагдаагийн Ерөнхий газраас тодруулахад “Говь-Алтай аймгийн Цээл суманд үйл ажиллагаа явуулдаг “Алтайн хүдэр” компанийн Таян нуурын уурхайн баяжуулах V үйлдвэрийн  карьерт нэг хүн нас барсан гэсэн мэдээллийн дагуу шалгаж байгаа. Талийгаач Орхон аймгийн харьяат 24 настай эрэгтэй Э гэгч байсан” гэв. Өмнө нь ч тус уурхайд осол аваар их гарч байсан юм. Ер нь энэ мэт уурхайд осол гарах, барилга дээр аваар гарах гэх мэт хэргүүд өдөр алгасахгүй гардаг. Тиймээс аж ахуй нэгжүүд хөдөлмөрийн аюулгүй байдлаа сайтар хангаж ажиллаж байхыг цагдаагийн байгууллагаас анхааруулж байна.