Сүүлийн жилүүдэд эмэгтэйчүүд ураг зулбуулах чанаргүй, баталгаагүй эм хэрэглэж, амь насаараа хохирсон тохиолдол цөөнгүй гарч буй тухай холбогдох яамныхан дуулгасан. Тодруулбал он гарсанаас хойш таван эмэгтэй үр зулбуулах эм хэрэглэснээс болж амиа алдсан гэх мэдээллийг Нийслэлийн эрүүл мэндийн газраас өгсөн.

Нэр ус нь тодорхойгүй, хаана үйлдвэрлэдэг нь ч  мэдэгдэхгүй “найдвартай зулбуулна” гэсэн эмийг томоохон худалдааны захуудаар мөн хувь хүмүүс зардаг гэдгийг  мэдэх хүмүүс цөөнгүй бий. Тиймээс ч энэ эмний тухай ам дамжин явсаар тухайн хэрэгцээт хүмүүсийнх нь чихэнд хүрдэг. Нууц аргаар үйлдэгддэг энэ гэмт хэргийн гол асуудал нь амнаас ам дамжин яригдах явдал. Өөрөөр хэлбэл, “Би жирэмсэн болчихсон. Авахуулах эсвэл зулбуулах хэрэгтэй гэж хэн нэгэн найз нь хэлэхэд тэнд тийм эм, тэд гэдэг” гээд л хэлчих жишээний. Ингэж нууц  аргаар,  гар дамжин худалдаалагддаг хууль бус эмүүд эцэст нь охид бүсгүйчүүдийг  үхэлрүү нь түлхэдэг. Харамсалтай нь тэд тухайн үед үр зулбуулах эм эргээд ямар асуудал үүсгэдгийг мэддэггүй. Мэдэхийг ч хүсдэггүй.

Уг нь Эрүүл мэндийн тухай хуульд “Эхийн хэвлийд байгаа ургийн хөгжил гажигтайн улмаас төрүүлэх боломжгүй болон эхийн амь насанд халтай тохиолдолд гэр бүлийн гишүүд зөвшөөрсний дүнд ургийн хөгжлийг зогсооно” гэж заасан байдаг. Гэтэл өдгөө жирэмсэлсэн охид, бүсгүйчүүд хүсээгүй жирэмсэлт, эцэг нь байхгүй, ар гэрийн боломжгүй гэх шалтгаанаар үр хөндүүлж байна. Хувийн, улсынх гэлтгүй захын эмнэлэг л үр хөндөх мэс ажилбарыг хийж байгаа.

Өнгөрсөн жил л гэхэд Нийслэлд эмэгтэйчүүдийн 120-иод эмнэлэг үйл ажиллагаа явуулдаг. Үүнээс 13 нь үр хөндөлт хийх зөвшөөрөлтэй гэсэн тоо баримттай байсан.  Гэтэл өнөөдөр “эмэгтэйчүүдийн эмнэлэг” гэсэн хаягтай газар болгон нууцаар үр хөндөлт хийж, зулбуулах эм худалдаалж байгаа нь нууц биш.

Юутай ч “нууцлагдмал”, “хүний эрхийг зөрчиж байгаа”, “хор уршигт” энэ үйлдлийг таслан сэргийлэх тал дээр хэрхэн ажиллаж байгаа талаар ЦЕГ-ын хэвлэл мэдээллийн ахлах байцаагч, цагдаагийн ахмад Ё.Лхагвасүрэнгээс тодрууллаа.

-Үр хөндүүлээд эсвэл зулбуулах эм хэрэглээд хохирсон эмэгтэйчүүд цагдаагийн байгууллагад хандаж байсан уу?
-Он гарсанаас хойш 60 гаруй эмэгтэй үр хөндүүлсэн гэсэн тоо барим ЭМЯ-наас өгсөн. Гэхдээ үр хүндүүлсэн эмэгтэйчүүдийн нэг нь ч цагдаагийн байгууллагад хандаагүй. Тиймээс хохирогч байхгүй учир үр хөндүүлээд амиа насаа алдсан, эрүүл мэндээрээ хохирсон хэргийг шалгах боломжгүй.

Харин хууль бусаар үр хөндсөн гэсэн хоёр эмнэлгийг илрүүлээд шалгаж байгаа. Одоогоор Эрүүгийн хуулийн 198 дугаар зүйл ангиар эрүүгийн хэрэг үүссэн. Гурван газрыг хууль бусаар үр зулбуулах эм зарсан гэдэг үндэслэлээр шалгаж байна

-Хэрэв хууль бус эм зарж борлуулсан тохиолдолд ямар хариуцлага оноодог вэ?
-Эрүүгийн хуулийн 198 дугаар зүйл ангид эмийн сангийн үйл ажиллагаа эрхэлж байгаа этгээд эмчилгээнд хэрэглэсэн, хэрэглэхийг хориглосон хугацаа дууссан эм бэлдмэлийг их хэмжээгээр борлуулсан бол хөдөлмөрийн хөлсний доод хэмжээг 100-250 дахин нэмэгдүүлсэнтэй тэнцэх хэмжээний төгрөгөөр торгоно. Эсвэл гурван сар хүртэлх хугацаагаар баривчлах ялаар шийтгэнэ гэж заасан байдаг.

-“Нарантуул” болоод томоохон захуудад хууль бус зулбуулах эм зардаг гэх мэдээлэл бий. Үүний дагуу шалгалтын ажлыг явуулсан уу?
-Шалгалтын ажиллагааг явуулж бүх гар дээрээс хуурамч эм зардаг байсан хүмүүсийг илрүүлж арга хэмжээ авсан. Дахин ийм төрлийн эм “Нарантуул” захад худалдаалагдахгүй байх гэж найдаж байна.

Үр зулбуулах  эмийг уусан эмэгтэйчүүд цус их хэмжээгээр алдаж, хордлогод ордог аж. Мөн хүүхэд төрүүлж чадахгүйд хүрч, амиа алдах аюулд ч хүрдэг гэдгийг мэргэжлийн хүмүүс хэлж байсан. Судалгаанаас харахад энэ эмийг оюутнууд болон бэлгийн боловсрол, мэдээлэл муутай алслагдмал газрын эмэгтэйчүүд ихээр хэрэглэдэг ба дийлэнхийг нь Эрээнээс бараа зөөдөг наймаачдаас авдаг хэмээж байсан юм. Уг нь энэ эмийг Эрүүл мэндийн газар, өрхийн эмнэлгүүдэд үзүүлснээр үнэ төлбөргүй, олгож эмчийн хяналт дор ураг зулбуулах эмийг үнэ төлбөргүй өгдөг байсан ч больсон ба охид бүсгүйчүүд энэ талын мэдлэг муутайгаас хууль бусаар эм зардаг хүмүүсийн өгөөш болж буй юм байна.