Дуучин Д.Болд өнгөрсөн амралтын өдрүүдэд болсон “UBS music awards” наадмаас “Би дурламаар байна” клипээрээ хоёр ч шагнал хүртээд буй. Гэтэл “Шилдэг график дизайнтай клип” номинацид шилдгээр шалгарсан уг бүтээл хулгайнх болох нь батлагдаж Төрийн соёрхолт дуучинг маань нэлээдгүй сандаргаад байгаа. Энэ талаарх яриа одоо ч намжаагүй байна. Энэ бүхний хариуд тэрбээр өөрийн твиттер хуудсаараа дамжуулан “Энэ клипийг "DOZ entertainment" 15 сая төгрөгөөр хийж гүйцэтгэсэн. Бас найруулагчаар нь Д.Доржсүрэн ажилласан. Уучлалтыг би биш надаас мөнгө авч хийсэн ДОЗ-ынхон л гуйх ёстой" гэжээ. Түүнчлэн шагналаа буцааж өгөхийн тухайд "Хөөрхий дөө. Энэ шагналыг нь буцааж өгсөн ч яалаа, байсан ч яалаа. Бидэнд үр өгөөжөө өгөөд байгаа тийм зүйл биш шүү" гэсэн тайлбарыг хийсэн юм.

Мөн дуучин Д.Болдыг урлагийнхан маань ч эхнээсээ өмөөрч эхэллээ. Монголын шилдэг гитарчин Д.Өлзий-Орших л гэхэд хулгайн дуу, ам барих гэдгийг үздэггүй хүн. Тэгвэл тэрбээр Д.Болдын бүтээлийг хулгайнх биш гэдгийг тайлбарлаж сууна. Өөжгийгийн хэлж буйгаар “ Д.Болд руу бүгд л хэд хоног дайрлаа. Ингэхэд Болдод яг ямар буруу байгааг ойлгохгүй л байна шүү залуусаа. Энэ дууны клип хуулбар байсан юм бол Болд тэрэнд юугаараа буруутай юм? Хийсэн улсууд нь бэлээхэн байж байхад. Тэд нартай нь ярьсан нь дээр болов уу? Тэр япон анимэшны дууг нь сонслоо. Тэс өөр л аятай юм байна. Төгөлдөр хуурын адилхан эхлэлийн хувьд иймэрхүү маягын тоглолт хаа сайгүй л байдаг. Жишээ нь манай Баачкагын Төгөлдөр гэж дууг сонсоод үздээ. Бараг л тиймэрхүү ая байгаа. Тэгэхээр Баачка тэр дуугаа 1990-ээд онд дуулсан байдаг. Тэрийг нь Баачкагаас япончуул хулгайлаад дараа нь Болд Японоос туусан болж таарах уу? Хөгжим ердөө долоохон эгшигээс бүрддэг. Давтагдах тохиолдол олон гардаг. Ганцхан манайд ч биш. Жишээ Josh Groban You raise me up Ирландын Danny Boy гэдэг дуутай тун адилхан. Ялангуяа сонгодгуудад бие биенээсээ санаа авсан зүйл бол зөндөө. Юм хийж ид бүтээж яваа нэгнийгээ муухай монгол зангаар доромжлохоо больё оо хүмүүсээ” гэж цахим хуудсаараа үзэл бодлоо илэрхийлжээ.

Өөжгийгийн өмнөхөн жүжигчин Н.Ялалт ч бас Д.Болдыг өмөөрч ярьж байсан билээ.