Зээл тусламжийг зохицуулах зөвлөлийн энэ оны сүүлийн хурал боллоо. Хуралд төрийн болон төрийн бус байгууллагууд, олон улсын байгууллагуудын 70 гаруй төлөөлөгчид оролцож, санал бодлоо солилцлоо. Хуралдаанаар эрүүл мэндийн салбарт хэрэгжиж байгаа бодлого, хөтөлбөрүүдийн хэрэгжилтийг орон нутагт эрчимжүүлэх болон тэдгээрийн хэрэгжилтэд хийсэн явцын үнэлгээний тайланг хэлэлцэх тухай шийдвэрлэсэн.

Тус хурлын тэргүүлэгч Эрүүл мэндийн дэд сайд Ж.Амарсанаа хэлэхдээ “Уулзалтын зорилго нь эрүүл мэндийн салбарын шинэчлэлийн асуудлаарх явцын талаар нэгдсэн мэдээлэл авах, орон нутгийн түвшинд эрүүл мэндийн салбарт хэрэгжиж байгаа бодлого хөтөлбөрүүдийн хэрэгжилт, олон нийтэд чиглэсэн эрүүл мэндийн төсөл хөтөлбөрүүдийн талаар илтгэлүүдийг сонсож хэлэлцэх юм.

Өнөөгийн байдлаар эрүүл мэндийн салбарт эрүүл мэндийн салбарын тогтолцооны үндсэн бүрэлдэхүүн хэсгүүдийг сайжруулах тухайлбал анхан шатны тусламж үйлчилгээ үзүүлэгч байгууллагыг бэхжүүлэх, эмнэлгийн салбарын шинэчлэл хийх, эмнэлгийн засаглалыг сайжруулах, хүний нөөцийг мэргэшүүлэх, сургалтын тогтолцоог бэхжүүлэх, эрүүл мэндийн санхүүжилтийн асуудлыг шийдвэрлэх, болон халдварт болон халдварт бус өвчнийг бууруулах, эх хүүхэд өсвөр үеийн эрүүл мэнд, хүн амын эрүүл мэндийн боловсролыг дээшлүүлэх чиглэлээр  арав гаруй  олон улсын байгууллагын 30 орчим төсөл, хөтөлбөрүүд амжилттай хэрэгжиж байна” хэмээлээ.

Мөн тус зөвлөл нь цаашид хэрхэн Эрүүл мэндийн салбарын шинэчлэлийг хэрэгжүүлэх, орон нутгийн түвшинд хэрэжиж буй төсөл хөтөлбөрүүдийн тулгамдсан асуудлууд, хэрэгжилтийг үр дүнтэй болгоход төрийн болон төрийн бус байгууллагууд, олон улсын байгууллагуудын ажлын уялдаа холбоог хангах, хамтын ажиллагааг улам үр өгөөжтэй, оновчтой болгох тухай асуудлуудыг шийдвэрлэх талаар хэлэлцсэн юм.