Тайландын ерөнхий сайд Инглак Шинаватраг огцрохыг шаардсан жагсаал энэ долоо хоногийн Мягмар гаригт ширүүсч, эсэргүүцэгчид Бангкок хотын цагдаагийн төв байр болон ерөнхий сайдын байрыг бүслэн хаахад хүргэлээ. Босогчид ерөнхий сайдын байрны гаднах саадыг авч хаяснаар цагдаа нар нулимс асгаруулах хий хэрэглэв. Гурван өдрийн турш үргэлжилсэн мөргөлдөөний улмаас 230 хүн шархдаж, гурван хүн нас барж, тус улсын тогтвортой байдалд сөргөөр нөлөөлж байна. Даваа гаригийн шөнө босогчдын талын тэргүүлэгч Судеп Даугсубан Засгийн Газрын гол байгууллагуудыг эзлэх болно гэдгээ амласан. Харин энэ хооронд ерөнхий сайд Шинаватра хэвлэлийн бага хурал зарлаж, хүч хэрэглэсэн эсэргүүцлийг зогсоохын төлөө ямар нэгэн зүйл хэрэгтэйг онцолсон хэдий ч тэрээр сонгогдоогүй зөвлөл болох Судепын шаардлагыг хүлээн авч чадахгүй гэдгээ мэдэгдлээ. Инглак 2011 онд олонхийн саналаар сонгогджээ. Жагсагчид түүнийг өөрийн ах Шинаватрагийн төлөө хууль батлаж, эрх мэдлийг өөртөө төвлөрүүлж, авилгал хээл хахуулийг гартаа авсан гэж буруутгаж байна. 2006 онд түүний ах Даксин Шинаватраг шахан зайлуулсанаас болоод улс төрийн тогтворгүй байдал бий болсон юм. Хоёр жилийн дараа Даксиныг эсэргүүцэгчид Бангкок хотын хоёр нисэх онгоцны буудал, хотын төв хэсгийг хэдэн долоо хоногийн турш эзэлж, 90 гаруй хүн нас барж байлаа. Тайландад жилд 26,5 сая жуулчин ирдэг бөгөөд энэ нь 620 сая долларын эдийн засагтай тус улсын эдийн засгийн 10 хувийг бүрдүүлдэг. Энэ нь жуулчдынхаа тоогоор Индонезийн дараа орох том улс. Хэрвээ улс төрийн ширүүн нөхцөл байдал үргэлжилвэл, эдийн засагт сөргөөр нөлөөлж болзошгүй.

    Инглакын найдвар бол хаант засаглал, цэргийнхэн болон шүүх эрх мэдэл дэх байр суурийг оролцуулан улс төрийн мухардлаас гарах юм. Тайландад цэргийнхэн 1930 оноос 18 удаа төрийн эргэлт хийхийг оролдсон ч бүтэлгүйтэж байв. “Хэрвээ бид энхийн аргаар шийдвэрлэж чадахгүй бол цэрэг оролцуулах болно” гэж Бангкок хотын хойд хэсэгт төр захиргааны байруудыг бүслээд байгаа босогчдын нэг болох 65 настай фермер Сатиен Пианкирп хэлжээ. Харин энэ удаагийн жагсаалыг армийн зүгээс олон нийтийн эрх ашигт нийцүүлэн шийдвэрлэх ёстой гэдгийг төлөөлөгч Колонел Виндай Сувари хэлжээ. Хэрвээ цагдаа нар, босогчдын хооронд цус асгаруулсан тэмцэл үргэлжилж, иргэдэд аюул учруулвал, цэргийнхэн ямар нэгэн үйлдэл хийнэ гэж Киотогийн их сургуулийн Зүүн Өмнөд Азийн судалгааны байгууллага үзсэн байна. Гэхдээ цэргийн оролцоо хязгаарлагдмал байх болно гэж тэрээр нэмж хэлсэн юм.

    Бангкок хотын өмнөд хэсгээс зайтай газарт орших хуа Хин ордонд суугаа эзэн хаан үүсээд буй нөхцөл байдлын талаар тайлбар хийгээгүй. Харин Тайландын хан хүү сөргөлдөгч талуудыг тайван замаар ойлголцохыг сануулсан юм. Эзэн хааны төлөөлөгч 94 настай генерал Прем Тинсуланондо Шинаватраг дэмжиж, шаардлагатай бол цэргийн хүчээр тусална гэж мэдэгдсэн. Гэхдээ ерөнхий сайдын огцрох эсэх асуудлыг энэ сарын 5-нд болох эзэн хааны төрсөн өдрийн дараагаар шийднэ гэж шинжээчид үзэж байна. Хэдийгээр түүнийг эрх баригчид бүх талаар дэмжиж байгаа ч эсэргүүцэгчид тэмцлээ үргэлжлүүлсээр байгаа тул албан тушаалдаа үлдэх магадлал бага гэж Ройтерс агентлагт дүгнэсэн байна.  Таксины гэр бүлийнхэн 1980-90-ээд оны сорилтын жилүүдэд огцом баяжиж, тэрбумтнууд болсон нь улсын эдийн засгийн бодлогыг өөрсдөдөөө тааруулсантай холбоотой гэж хардах хүмүүс цөөнгүй.

Энэ оны дөрөвдүгээр сард болсон ардчилсан орнуудын хамтын нийгэмлэгийн сайд нарын бага хурлаар Шинаватра ахынхаа төлөө ажиллаж байгаа гэдгийг үгүйсгэсэн юм. Энэ нь олон улсын томоохон хурал дээр улс орныхоо байр суурь гэхээсээ илүүтэй хувийн байр суриа илэрхийлсэн ичгэвтэр явдал боллоо хэмээн Бангкокын хэвлүүдэд шүүмжилж байлаа. Тэрээр улс орныхоо ардчиллын хөгжил гэхээсээ илүүтэй, дотоод зөрчлийг танилцуулсан хэмээн тэд үзжээ. Энэ нь ч бас жагсагчдын дургүйцлийг хүргэх нэг шалтгаан болсон байж болзошгүй.