Төрийн өмчийн хөрөнгийг өөрийн үүсгэн байгуулсан компанидаа угаасан хэрэгт сэжиглэгдэж байгаа “Хөтөлийн цемент шохой” үйлдвэрийн удирдлагуудын хэргийг Авлигатай тэмцэх газарт шалгаж байгаа. Тодруулбал, “Хөтөлийн цемент шохой” компанийн захирал А.Шоовдор, дэд захирал Д.Валяхүү, Үйлдвэрийн хангамжийн хэлтсийн дарга нарын долоон хүнийг өнгөрсөн наймдугаар сарын 20-нд Авлигатай тэмцэх газраас саатуулан, шалгаж эхэлсэн.  Улмаар тус компанийн захирал А.Шоовдорын цагдан хорих хугацааг сунгаж бусад удирдлагуудыг гадуур шалгаж байсан юм. Тэгвэл өнгөрсөн долоо хоногт ар гэрийнхэн болон өмгөөлөгчийнх нь хүсэлтээр батлан даалтад гаргасан байна.


  Говь-Алтай аймгийн Цээл сумын нутаг дэвсгэрт үйл ажиллагаа явуулдаг “Алтайн Хүдэр”  ХХК-ний хүдэр тээвэрлэх гэрээт компаний жолооч Д.Мөнхзул нь өнгөрсөн  оны 12-р сарын 15-ны өдөр Алтай сумын Тулга толгой гэдэг газар 71-50 УНР улсын дугаартай Давун маркийн авто машин жолоодож яваад тээврийн хэрэгслийн хөдөлгөөний аюулгүй байдлын болон ашиглалтын журам зөрчсөнөөс 10-83 УБҮ улсын дугаартай "Ланд Круйзер-200" маркийн авто машинтай мөргөлдөж иргэн Б.Амарсанаа С.Батжаргал нарын амь насыг хохироосон юм.
Мөн Э.Энхмарт Ц.Сансарбаяр нарын биед хүндэвтэр гэмтэл учруулсан хэрэгт орлогч прокурор Н.Ганболд 2013 оны 07-р сарын 31-ны өдөр №47 дугаартай яллах дүгнэлт үйлдэн шүүхэд шилжүүлсэнээр  анхан шатны шүүх хурал 2013 оны 12-р сарын 04-ны өдөр боллоо.
Шүүгдэгч Д.Мөнхзулд Эрүүгийн хуулийн тусгай ангийн 215 дугаар зүйлийн 215.4 дэх хэсэгт зааснаар тээврийн хэрэгсэл жолоодох эрхийг 3 жилийн хугацаагаар хасч 5 жил 1 сарын хорих ялыг жирийн дэглэмтэй хорих ангид ял эдлүүлэхээр шийдвэрлэсэн байна.

Нийслэлийн прокурорын газраас Ашигт малтмалын газрын Кадастрын хэлтсийн даргын үүргийг түр орлон гүйцэтгэгч Н.Чинбаатар нарт холбогдох хэргийг сэргээн шалгах тогтоол гаргаж, нэмэлт мөрдөн байцаалт хийлгэхээр АТГ-ын Мөрдөн шалгах хэлтэст шилжүүлсэн байна. АМГ-ын даргаар ажиллаж байсан Д.Батхуяг нарт холбогдох хэргээс шүүх 108 тусгай зөвшөөрлийг хууль бусаар олгосныг тогтоож, хүчингүй  болгох шийдвэр гаргасан. Харин түүнээс хоёрыг нь "Өсөх зоос" компанийнхан ямар нэг байдлаар авсан аж. Тус компани нь Өмнөговь аймгийн Гурвантэс сумын нутагт байрладаг, сонгон шалгаруулалтын журмаар олгох ёстой ашигт малтмалын хайгуулын 15177Х, 15178Х дугаартай тусгай зөвшөөрөлтэй талбайг АМГ-ын дарга асан Д.Батхуяг, Кадастрын хэлтсийн даргаар ажиллаж байсан Л.Даваацогт нараас ямар ч сонгон шалгаруулалтгүйгээр авчээ. Үүнийг нь шат шатны шүүх нотолж, хүчингүй болгох шийдвэр гаргасан. Гэтэл тус компанийнхан Н.Чинбаатартай үгсэн тохиролцож, шүүхээс хүчингүй болгосон тусгай зөвшөөрлийг сэргээж авсан гэдэг.  Тиймээс Н.Чинбаатар тэргүүтэй хэд хэдэн хүнийг хэргийг дахин шалгаж эхэлсэн талаар эх сурвалж хэлж байна. Дашрамд хэлэхэд, эл хэрэгт УИХ-ын гишүүн Б.Бат-Эрдэнийг ч холбоотой гэж яригдах болсон.

"Оюутолгой" ХХК-г монгол ажилчдын эрх ашгийг зөрчиж, ялгавартайгаар цалин олгодог гэж иргэн С.Гантуяа шүүхэд өгөн ялалт байгуулсан билээ. Тэгвэл МХЕГ-ын улсын байцаагч Ж.Алтанбагана тус компанийг  шүүхэд өгч, нэхэмжлэл гаргасан байна.
   "Оюутолгой" ХХК нь өнгөрсөн хугацаанд Гашуунсухайт хүртэл 100 гаруй км зам тавихдаа 100 гаруй нүх ухаж элс, хайрга олборлож байсныг МХЕГ-аас тогтоожээ. МХЕГ-аас тэднийг хууль бусаар зөвшөөрөлгүй элс, хайрга олборлосон гэж удаа дараа шаардлага хүргүүлсэн ч хүлээж аваагүй аж. Тиймээс ийнхүү МХЕГ-ынхан шүүхэд нэхэмжлэл гаргажээ.

Сүхбаатар аймаг дахь Шийдвэр гүйцэтгэх албаны шийдвэр гүйцэтгэгч В.Сүхбат нь албан үүргээ гүйцэтгэж яваад амь насаа алдсанд ШШГЕГ-аас эмгэнэл илэрхийлээд байгаа билээ.
 Тодруулбал, ахлах шийдвэр гүйцэтгэгч ахмад Ц.Аваасүрэн, шийдвэр гүйцэтгэгч В.Сүхбат нар Баруун-Урт сумын иргэн Б.Эрдэнэсүхээс хүүхдийн тэтгэлэг болон 88 толгой малыг гаргуулахаар гэрт нь очсон байна. Гэвч Б.Эрдэнэсүх шүүхийн энэ шийдвэрийг эсэргүүцэж, шийдвэр гүйцэтгэгч В.Сүхбатыг буудан амийг нь хөнөөсөн юм. Үүгээр ч зогсохгүй төлбөр авагч Д.Отгонзаяагийн талын таван хүн дээр очин иргэн Батсайханыг буудан амийг нь бүрэлгэж, нэг хүнийг шархдуулсан байна. Ийнхүү хоёр хүний аминд хүрч, нэг хүнийг шархдуулсан Б.Эрдэнэсүх гэгчийг өнөөдөр 12.00 цагийн үед олсон бөгөөд тэрбээр амиа хорлосон байжээ. ЦЕГ-ийн хэвлэл мэдээллийн төвөөс өгч байгаа мэдээллээр хэрэгтэний цогцосыг хэрэг гарсан газраас 10 км-ийн зайгаас олсон байна. Харин эхнэрийг нь эрэн сурвалжилж байгаа гэх мэдээлэл байгаа ч цагдаагийн байгууллагаас үүнийг үгүйсгэлээ. Эхнэр нь одоогоор байцаалт өгч байгаа аж.
Юутай ч хүн амины хэрэг үйлдсэн этгээд өөрийнхөө амийг егүүтгэсэн учир эл хэрэг хэрэгсэхгүй болон үлдэх магадлал өндөр байгаа юм.