УДЭТ-ын ерөнхий найруулагч Н.Наранбаатар өнөөдөр төрийн соёрхолт хэмээх эрхэм хүндэт шагналаа гардан авах гэж байна. Ингэснээрээ тэрбээр драмын урлагаас төрийн соёрхол хүртсэн анхны найруулагч болж байгаа юм.

Шагнал гардан авах ёслол Төрийн ордонд 11.00 цагт эхэлнэ.

Тэрбээр тайз, дэлгэцийн урлагт арав гаруй жил зүтгэхдээ дуучин, жүжигчин, найруулагчаар ажиллаж, үзэгчдээс ямагт онц дүн авсаар ирсэн билээ.

“Хар санаа, хайр сэтгэл” жүжгийн Фердинанд, “Саран хөхөө”-гийн номч түшмэл Дарма, “Атга нөж”-ийн Жамуха, “Харц хатан”-ы Ёндон гээд түүний нэрийн хуудас болсон дүрүүд ар араасаа эгнэнэ. Тэгвэл найруулсан бүтээлийнх нь хамгийн содон шигтгээ нь мэдээж өнгөрсөн жил үзэгчдэдээ хүргэсэн “Гамлет” байж таарна. Түүний найруулагч “Гамлет”-аас жинхэнэ монгол сэтгэлгээ, монгол үнэр үнэртэж чадсанаараа үзэгчдээс өндөр үнэлгээ авсан билээ. Мөн “Тэнгэрийн хүү”, “Тамгагүй төр” зэрэг бүтээлүүд нь ч түүнийг ямархан чансаатай найруулагч болохыг гэрчилнэ.