Зар сурталчилгаа, мэдээ мэдээллээ ялгаж мэдэхгүй хэсэг нөхөд сэтгүүлзүйн нэр хүндийг гутаалаа гэх яриа хаа сайгүй сонсогдоно. Энэ бол "Монгол HD" телевизийн Монголын сэтгүүлзүй гэж худалдагдсан салбар, сэтгүүлчид нь гэж худалч хүмүүс гэдгийг олон нийтэд ойлгуулахыг оролдсон нэвтрүүлгийн талаарх зарим хүмүүсийн яриа.

Энэ мэт "Монгол HD" телевиз олон нийтийг төөрөгдүүлсэн, сэтгүүлзүйг доромжилсон үйлдэл гаргасан уу, үгүй юу гэдэг  дээр олон хүн янз бүрээр  л санаа бодлоо илэрхийлж байна. Гэхдээ шүүмжлэх хүмүүс илүүтэй байгааг хэлэх нь зүйтэй биз ээ.
Тус телевиз хэвлэл мэдээллийн байгууллагууд мэдээ, мэдээлэл бүрийг төлбөртэй тавьдаг мэт андуу ташаа мэдээлэл өгч, үүнийгээ батлахын тулд бизнесийн өөр нэг байгууллагын өмнөөс худал мэдээлэл тарааж, бас өрсөлдөгч өөр нэг байгууллагын нэр хүндэд халдсан мэдэгдэл хийсэн. Гэхдээ тэд мэдээллийг шударгаар олж авах ёс зүйн дүрмээ уландаа гишгэжээ.

"Гацуурт" компани хөрөнгө мөнгө хаяж шинэ техник, технологи нэвтрүүлж эл телевизийг байгуулсан нь сайшаалтай ч сэтгүүл зүйн наад захын ойлголт байхгүй хүмүүс удирдаж, удирдлагынхаа хий гэснийг үг дуугүй дагадаг хүмүүс ажиллаж байгаа нь эргээд хөнөөл тарьж байна.

Тэд сэтгүүл зүйг бохир байна гэдгийг илчлэхийн тулд арваад сонин, телевиз, сайтад 400-1 000 000 төгрөгийг нэг өдөрт гаргасан байдаг. Ингэснээр тэд булхайг таниулж, бохирыг ил болгоно гэж бодсон ч юм эсэргээрээ эргэчих шиг боллоо. Ер нь бизнесээ сурталчлах гэж буй дундаж компани  ч ийм мөнгийг нэг дор гаргаж чадахгүй. Тэрбумаар тоологдох хөрөнгөтэй Л.Чинбат түүний охин Ч.Номингийн толгойлдог  "Монгол HD" телевиз  л шударга болох гэж шударга бус замаар мэдээлэл цуглуулахын тулд ингэж авирлаж байгаа байх.
    Л.Чинбат "Монгол HD" телевизийг байгуулж байхдаа юуг онцолж байв?
Тэрбээр "Улс төрд орох гэж байгаа хүмүүс биш улс төрд орсон хүмүүс хэвлэл мэдээлэлтэй болдог гэж бодож байгаа. Хүний амьдралд нийгэмд хэвлэл мэдээлэл их чухал зүйлийн нэг. Өнөөдөр манайхан хүмүүсийн оюун санаанд малын тэжээл шиг юм хийж байна ш дээ. Би нэг талаас нь Монголчуудаа хоол хүнсээр нь эрүүл байлгая гэж бодоод жаахан ажил эхлээд л байж байтал оюун санаа нь хэцүүдэж эхэллээ. Тийм болохоор хэвлэл мэдээллийн  салбарт  хөрөнгө оруулалт хийсэн. Би телевиз дээрээ бусад салбаруудаасаа илүү анхаарал хандуулж байгаа. Өнөөгийн манайд мөрдөгдөж байгаа телевизийн бодлого шинэчлэгдэх ёстой. Телевизийн тухай хууль алга, хараа хяналт байдаггүй. Би аялал жуулчлал, зочид буудал, уул уурхай, газар тариалан хөдөө аж ахуй гээд бүхий л салбарт ажиллаж байна. Гэтэл манайд телевизийн салбар дампуурчихсан юм билээ. Телевизийн тухай дэлхийд стандарт тогтоочихсон байхад манайд ямар ч стандарт байхгүй байна. Бид нар телевизийн дуудлага худалдаагаар ороод эрхээ 800 саяаар худалдаж авсан.  Тэгээд хөрөнгөө гаргаад Монголд анхны HD телевизийг байгуулсан. Цаана чинь 200 сая хүнтэй газар  2-3 телевиз ажиллаж байхад хоёрхон сая хүн амьтай манайд 20 гаруй телевиз байна. Илүүдчихээд байхад яагаад сая нэмээд хоёр телевизийн зөвшөөрөл нэмээд өгч байгаа юм бэ. Миний хувьд энэ салбарыг өөрчилье чанаржуулъя гэдэг үүднээс хөрөнгө оруулалт хийж орсон" гэж байв.  Энэ мэтээр тэрбээр дампуурчихсан телевизүүдэд яаж ажилладгийг харуулна. Өнөөгийн манайд мөрдөгдөж байгаа телевизийн бодлого шинэчлэгдэх ёстой гэх зэргээр сайрхсан байдаг. Гэтэл түүний өөрчлөлт сэтгүүл зүйн нэр төрийг гутаах байсан гэж үү.

   Хамгийн сүүлд л  гэхэд Л.Чинбатын гэх зочид буудалд хүүхэд амиа алдсан харамсалтай хэрэг гарсан. Тодруулбал, Монголын хамгийн тансаг зэрэглэлийн гэгдэх “Тэрэлж” зочид буудлын бассейнд дөрвөн настай хүү живж амиа алдсан харамсалтай хэрэг гарч, олныг цочирдуулсан. Амиа алдсан хүүгийн хувьд бассейнд тоглож байхдаа хамгаалалтын хувцас, хэрэгсэл өмсөөгүй байсан гэдэг. Гэхдээ дөрөвхөн настай хүү өөрөө хамгаалалтын хувцсаа өмсөнө гэж байхгүй. Гагцхүү тухайн буудлыг ажилчид л үйлчлүүлж байгаа бяцхан хүүг анхаарах ёстой. Гэтэл тэр үед бассейны ажилчид ч байхгүй байсан гэдгийг зарим хүмүүс хэлж байгаа.   Асрагчийнхаа хамт усан санд тоглож байсан дөрвөн настай А-гийн хувьд Монголын томоохон бизнесмений хүү гэдэг. Хэрэг гардаг өдөр “Тэрэлж” зочид буудлынхан байнгын үйлчлүүлэгчиддээ онцгой хямдрал зарлаж, үйлчилгээний төлбөрөө нэг хүний хоногийн 60 мянган төгрөг болгон бууруулж, үүндээ саун, бассейн, зоог зэргийг багтаасан байсныг ч эх сурвалж хэлж байсан.  Мэдээж тухайн зочид буудалд хүн нас барсан л юм чин тэр үед холбогдох хүмүүсийг нь шалгаж, байцаалт авч эхэлсэн.  Мөн хүний амь нас хохирсон юм чинь эрүүгийн хэрэг ч үүссэн. Гэхдээ өдгөө тухайн хэрэг нам жим боллоо. Тус зочид буудлын хэчнээн хүнд эрүүгийн хэрэг үүсч, хүүгийн үхэлд хэн буруутай болж шалгагдаж байгааг  ч хэлэх хүн алга. Налайхын цагдаа, Цагдаагийн Ерөнхий газар бүгд эл хэргийн талаар хэлж, ярихгүй, мэдээлэл өгөхгүй байх үүргийг авчээ.

Тус зочид буудалтай холбоотой энэ асуудал анхных биш бөгөөд өнгөрсөн Цагаан сараар амрагчдынхаа бохирыг Туулын усанд асгаж байсан явдал гарсныг тэндхийн иргэд,  ажилладаг хүмүүс андахгүй мэддэг юм билээ.

Энэ мэт Л.Чинбатын компаниудтай холбоотой янз бүрийн  хэргүүд байнга гарсаар байдаг. Гэтэл өдгөө түүний итгэл хүлээлгэдэг телевиз нь ч хүртэл чихийг нь нэлээд халууцуулаад авах шиг боллоо.