Манай улсад гэр бүлийн хүчирхийлэл гэдэг маш том санаа зовних асуудал бий.  Хүн бүр мэддэг ч хэрхэн сэргийлж, дарж авахаа мэддэггүй. Улмаар цагдаа, шүүхийнхнийг буруутгаж хүмүүст хүрч ажиллаж чадахгүй байгаа мэтээр ярьдаг. Гэвч гэр бүлийн хуулинд цагдаагийн гүйцэтгэх үүргийг заасан байдаг ба энэ нь хөгийн юм байдаг гэхэд болно. Тухайлбал, гэр бүлийн хүчирхийлэлд автсан хүнийг хамаатан садан болоод хоргодох байранд хүргэнэ гэж  заасан байх жишээний. Гэтэл гэр бүлийн хүчирхийлэлд өртсөн хүмүүсийг хамаатнууд нь тэр бүр орогнуулахыг хүсддэггүй. Түүнчлэн манай улсад гэр бүлийн хүчирхийлэлд өртөгсөдийг орогнуулах тусгай байр ч байхгүй.

Харин хорооны нийгмийн ажилчдад бол цагдаа нарыг бодвол энэ гэмт хэргийн эсрэг ажил хэрэг явуулах боломжууд бий гэдгийг хуулинд тусгаж өгчээ.  Тодруулбал,  гэр бүлийн хуулинд хорооны болон нийгмийн ажилчид өөрсдийн ажилдаа гэр бүлийн хүчирхийллийн эсрэг санал, төслийг боловсруулан оруулсан байх, улмаар шаардагдах мөнгийг улсаас гаргуулах гэж заасан байдаг байна. Энэ нь тухайн нийгмийн ажилтан үнэхээр хороондоо сайн ажиллаж, гэр бүлийн хүчирхийллээс урьдчилан сэргийлж чадвал төрөөс төсөв мөнгийг нь ч гаргаад өгнө гэсэн үг юм. Гэтэл хорооны ажилчид энэ айлын нөхөр архи ууж хүүхдүүдээ зовоож, эхнэрээ зоддог гэдгийг мэдсээр байж дорвитой арга хэмжээ авч чадахгүй явсаар эцэст нь хохирогч амиа алдахад хүрдэг.

Түүнчлэн бид олон нийтээрээ гэр бүлийн хүчирхийлэлтэй тэмцэж чадахгүй байна. Энэ гэмт хэргийг бүр хүлээн зөвшөөрөөд байгаа юм. Адаглаад хэн нэгэн эмэгтэйг  тусламж эрж, хашгирч байхад очиж туслах сэтгэл бидэнд дутдаг.  Өөрөөр хэлбэл, “Эр эмийн хооронд илжиг  бүү жороол” хэмээн хүчирхийлэлд өртөгчийг харсан ч хараагүй юм шиг, сонссон ч сонсоогүй юм шиг явдаг. Гэтэл энэ явдлын цаана нэгэн хүний алтан амь, үр хүүхдийн хувь заяа яригдаж байдаг. Тиймээс бид бүхэн нийтээрээ, хөгшин, залуугүй гэр бүлийн хүчирхийллийн эсрэг хөдөлж чаддаг байх, цаашлаад энэ байдлыг даамжруулахгүй байх нь чухал юм.

Өнгөрсөн он болоод энэ онд үйлдэгсэн гэр бүлийн хүчирхийллийн хэдэн ноцтой жишээг дурдахад,

Хэрэг 1: Авга эгчдээ зодуулж, гурван жил амбаарт хоригдсон хүү: Гурван жилийн турш дунд сургуулийн багш эмэгтэй нас барсан ахынхаа хүүг амбаартаа хорьж, хоолны үлдэгдлээр тэжээж байсан гэх санаанд багтаж, ойнд буумгүй хэрэг хэдэн сарын өмнө Хөвсгөл аймагт илчлэгдсэн юм. 16 настай хүүг гурван жилийн турш хорьж, тарчлаасан үнэн түүх даанч элэг эмтлэм.

Хэрэг 2: Таван настай хүүгээ заазуурдсан хэрэг.  Эл  хүүгийн аав удаа дараа гэр бүлийн хүчирхийлэл үйлдэж, эхнэрээ зодож дарамталдаг байсан гэх.  Удаа дараа эрүүлжүүлэгдэж, захиргааны хариуцлага авч байсан энэ нөхрийн булай хоёр настай хүүхдээ алахаар завдаж, таван настай хүүхдээ заазуурдсаны дараа илчлэгдсэн.

Хэрэг 3: Өнгөрсөн есдүгээр сард Говьсүмбэр аймагт багш эмэгтэйг нөхөр Г нь барилгын багажаар зодож, бүх ясыг нь хугалж амь насыг нь хөнөөжээ. Тэрбээр эхнэртэйгээ 21 жил ханилах хугацаандаа байнга зодож, 31 шүдийг нь булга цохиж, хүнд гэмтлүүд удаа дараа учлуурж байжээ.

Хэрэг 4: 25-хан настай залуу эхнэрээ байнга зодож, хардаж сэрдэж дарамталдаг байсан байгаа. Улмаар эхнэр нь тэвчихээ байж салахаар шүүхдэлцсэн байдаг. Гэтэл хүчирхийлэл үйлдэгч нөхөр эхнэрийнхээ ахыг хөнөөж, шүүхийн шийдвэр гүйцэтгэгчийн ч амийг хөнөөсөн хэрэг гарсан.

Хэрэг 5: Хамгийн сүүлд л гэхэд 21 настай бүсгүй найз залуудаа зодуулсаны улмаас бүх эрхтэн нь няцарч, цөс нь хагарч, харамсалтайгаар амиа алдсан хэрэг гарсан.

Гэр бүлийн хүчирхийлэл эцэстээ үхэл эсвэл хагацлыг авчирдаг.