НҮБ, НАТО зэрэг олон улсын аюулгүй байдал, дэлхийн ард түмнүүдийн амгалан тайван байдлыг сахин хамгаалах томоохон байгууллагууд Монголын энхийг сахиулагчдыг өндрөөр үнэлж байгаа нь манай орны батлан хамгаалах, зэвсэгт хүчин улам бүрий даяаршиж буйн илэрхийлэл билээ. Энэ хэрээр бид дэлхийн улсуудын нийгэм, эдийн засгийн хөгжил дэвшилтэй хөл нийлүүлэн алхаж, мөнхүү улс орнуудад тулгардаг аливаа асуудал, бэрхшээлүүдийг хамтдаа сөрөн гарах эрмэлзэл, чадвартай байх ёстой.Дэлхий нийтийн өмнө тулгардаг аюулгүй байдлын асуудлуудыг шийдвэрлэх арга замыг эрэлхийлэх, зэвсэгт мөргөлдөөн, терроризмын эсрэг хамтдаа тэмцэх, улс орнуудын туршлага солилцох, судалгаа шинжилгээ хийх, заавар зөвлөмж гаргах, томоохон сургалтуудыг зохион байгуулах, АНУ, Европын холбооны улсуудын улс төрийн нэрт зүтгэлтнүүд, батлан хамгаалах, зэвсэгт хүчний генералуудыг урьж, лекц уншуулах зэргээр өргөн далайцтай ажилладаг Жорж Маршаллын нэрэмжит Аюулгүй байдлыг судлах Европийн төв нь ХБНГУ-ын Мюнхен хотноо байрладаг.
БХЯ-ны БХЗГ-ын Зэвсэглэл, техникийн хэлтсийн дарга, хурандаа Б.Батбаяр 2011 онд энэхүү төвд “Аюулгүй байдлыг гүнзгийрүүлэн судлах” сэдвийн хүрээнд дөрвөн сарын сургалтанд суужээ. Тэрбээр дээрх сургалтын материалууд болон өөрийн сонирхон судалсан баримтууд, тус төвөөс эрхлэн гаргаж, тусгайлан сургалтанд хамрагдсан гишүүддээ тогтмол илгээдэг “Терроризмын эсрэг шинэ сэтгүүл”-ийнхээ дугааруудыг энэ талаар эрдэм шинжилгээ, судалгааны ажил эрхэлдэг БХИС-д шилжүүлэн өгөх хүсэлтээ илэрхийлсний дагуу өнөөдөр Удирдлагын академийн багш, дэд хурандаа Ц.Бат-Орших хүрэлцэн ирж, энэхүү “номын өглөг”-ийг хүлээн авлаа. Энэхүү сургалтын материал, судалгааны бүтээл, сэтгүүл нь терроризмын аюулын эхний харанга, сануулга сонсч эхэллээ гэгдээд буй манай орны батлан хамгаалах, аюулгүй байдлын сургалт, оюутан сонсогчдод шинэлэг агуулга бүхий хичээлийн чухал гарын авлага болох нь дамжиггүй.
Дашрамд дурдахад, Аюулгүй байдлыг судлах Европийн төвд НАТО-гийн гишүүн орнуудын аюулгүй байдлын чиглэлээр ажилладаг байгууллагын удирдлага, улс төрийн албан тушаалтнууд болон судлаачдыг хамарсан 14 хоног болон 1-4 сарын сургалтуудыг байнга зохион байгуулдаг юм байна. Улс орнуудын төлөөлөгчдөд зэвсэгт мөргөлдөөн, терроризмын эсрэг хэрхэн тэмцэх, улс орны аюулгүй байдлаа хэрхэн сахин хамгаалах талаар эхлээд онолын сургалтыг явуулсны дараа амьдрал дээр хэрэгжүүлэх арга зам, мухардлаас гарах гарц, асуудалд хандах хандлага зэргээрээ суралцагчид хоорондоо харилцан туршлага солилцож, дадлага хийх нөхцлийг бүрдүүлдэг аж.
