Баянхонгор аймгийн Гэмт хэргээс урьдчилан сэргийлэх ажлыг зохицуулах зөвлөлийн үйл ажиллагааг эрчимжүүлэх, гэмт хэрэгтэй тэмцэх ажилд төрийн байгууллагуудын идэвхи оролцоо, хяналт шалгалтыг эрчимжүүлэх, гэмт хэрэг, зөрчил гарч байгаа шалтгаан нөхцлийг арилгах зорилгоор аймгийн Гэмт хэргээс урьдчилан сэргийлэх ажлыг зохион байгуулжээ.

Хяналт, шалгалтын хүрээнд аймгийн төв Баянхонгор сум орох 4 замын хэсэгт хяналтын пост гаргаж,аймгийн төвийн 1-9 дүгээр багийн нутаг дэвсгэрт үйл ажиллагаа явуулж байгаа аж ахуйн нэгж, байгууллагуудын харуул, хамгаалалт, дэлгүүр, баар, ресторанд хяналт, шалгалтыг хийж өмчлөх эрхийн эсрэг гэмт хэрэг, тээврийн хэрэгслийн хөдөлгөөний аюулгүй байдал, ашиглалтын журмын эсрэг гэмт хэрэг, байгаль хамгаалах журмын эсрэг гэмт хэргийг илрүүлэх, таслан зогсоох, албан байгууллага, аж ахуй нэгжүүдийн харуул хамгаалалтын байдалтай танилцан заавар зөвлөгөө өгч ажилласан байна.

            Дээрх хугацаанд архидан согтуурч иргэдийн амгалан тайван байдал алдагдуулсан 1 этгээдийг эрүүлжүүлж, согтууруулах ундаа хэрэглэсэн үедээ тээврийн хэрэгсэл жолоодсон 1 зөрчлийг илрүүлж, нийт 204 тээврийн хэрэгслийг шалгаж, зөрчилтэй явсан 6 тээврийн хэрэгслийг түр саатуулж, алт металл хайгч 16 ширхэг, улсын бүртгэлгүй, нуугдмал галт зэвсэг 1 ширхэг, бичиг баримтгүй автомашины улсын дугаар 4 ширхэг, 1 машин чулуу, тээрэмдсэн чулуу 2 шуудай, 7 автомашины татвар төлүүлж, үхэр, адууны шир 505 ширхэг, хонь ямааны арьс нэхий 3110 ширхэг, 34 ширхэг үхрийн мах, 1062 ширхэг хонины мах, 1329 ширхэг ямааны мах, 50 ширхэг адууны мах, мал амьтны гарал үүслийн бичиггүй 5 автомашиныг шалгаж, арга хэмжээ тооцож, 7 зөрчилд торгуулийн арга хэмжээ авч ажилласан байна. Дэлгүүр, баар, ресторан, зоогийн газар зэрэг 29 объектийг шалган илэрсэн зөрчлийг арилгуулахаар аймгийн Мэргэжлийн хяналтын улсын байцаагчийн шаардлага бичүүлж, илэрсэн зөрчил дутагдлыг засуулах арга хэмжээ авахуулсан байна.

            Нэгдсэн арга хэмжээний үеэр гэмт хэргийн шинжтэй 2 мэдээ, мэдээллийг аймгийн Цагдаагийн газрын мөрдөн байцаах тасагт шалгуулахаар хүргүүлж, нэгдсэн арга хэмжээний хүрээнд хийж гүйцэтгэсэн ажил, цаашид анхаарах асуудлын талаар аймгийн Гэмт хэргээс урьдчилан сэргийлэх ажлыг зохицуулах зөвлөлд аймгийн прокурорын танилцуулга хүргүүлжээ.