“Doz entertainment”-ын тав дахь уран бүтээл “Кино шиг амьдрал” инээдмийн кино өнөөдөр нээлтээ хийнэ.

Тус киноны зураг авалтыг Вьетнам улсад хийсэн бөгөөд киноны зохиолч найруулагчаар СТА Ш.Доржсүрэн, продюсераар СТА А.Мөнгөнзул, дүрүүдэд Батхишиг, Э.Уянга, Э. Чинзориг нар тогложээ.

Уран бүтээлчдийнх нь хэл буйгаар “…өнөөдөр бид бие бие рүүгээ инээж чадахаа больчихож. Уг нь хүмүүс аз жаргалтай инээж байх ёстой. Бид айл бүрд очиж, амьдралыг аз жаргалтай сайн сайхнаар олж хараач ээ гэж хэлж чадахгүйгээс хойш уран бүтээлээрээ энэ санаагаа гаргая гэж бодсон. Хэдийгээр бидний хийсэн кино инээдмийн боловч хүмүүст инээдмээр дамжуулж ухаарал бэлэглэе гэж хүссэн” гэжээ.

"Амьдрал киноноос эхтэй юм бол яагаад амьдрал дээр кино шиг үйл явдал болдоггүй юм болоо..? Багаасаа кинонд дурлаж өөрийнхөө амьдралыг киногоор төсөөлдөг Жарантав энэ асуултыг үргэлж өөртөө тавьдаг нэгэн.Аав ээжийгээ болон эргэн тойрны бүх зүйлсийг киноны үйл явдалтай зүйрлүүлэн харах дуртай Жарантавд сонирхолтой зүйлс тохиолдож өгөхгүй л байна.Түүнд хамгийн сүүлд тохиолдсон нэгэн ичмээр явдал нь аавынх нь танилцуулж өгсөн нэгэн чинээлэг айлын охин өөрөөр нь аймшигтайгаар тохуу хийсэн явдал юм" Тийнхүү кино сонирхолтойгоор цааш үргэлжилнэ.

Нээлт өнөөдөр "Тэнгис" кино театрт 16.00 цагт болно.