Олныг цочирдуулсан хийгээд авлига, хээл хахуулийн хэргүүдийн мөрдөн байцаалтын явцыг танилцуулж байна.

  Энэ оны наймдугаар сард Завхан аймгийн Улиастай сумын төвд хүн амины ноцтой хэрэг гарсан юм. Тодруулбал хурандаа Д.Буянжаргал нь Завхан  аймгийн Улиастай сумын төвд байрлах “Уран байгаль” зочид буудалд хардалтын улмаас өмгөөлөгч асан Н.Болорчулууны хэвлий тус  газар цохиж амь насыг  нь хохироосон хэрэг үйлдсэн. Улмаар аймгийн  прокурорын газраас Монгол Улсын Эрүүгийн  хуулийн тусгай ангийн 91 дүгээр  зүйлийн 91.1-дэх хэсэгт зааснаар  яллах  дүгнэлт үйлдэж  харъяаллын  дагуу Завхан аймаг дахь сум  дундын нэгдүгээр шүүхэд хянан  шийдвэрлүүлэхээр шилжүүлжээ.

Д.Буянжаргал нь их хартай нэгэн байсан ба тухайн үед өмгөөлөгч Н.Болорчулуун хурандаагийн эхнэрийн дүүг өмгөөлөхөөр тус аймагт очоод байсан юм.

Төрсөн хүүгээ хөнөөсөн МоАХ-ны анхдагчдын нэг Г.Бошигт Улсын дээд шүүхийн хяналтын шатны шүүхэд гомдол гаргажээ. Учир нь тэрээр анхан болон давж заалдах шатны шүүхээс оноосон 10 жил, нэг сарын хорих ялыг эсэргүүцэж, ийнхүү хяналтын шатны шүүхэд хандаад байгаа аж. Тэрээр өнгөрсөн хоёрдугаар сарын 3-4-нд шилжих шөнө Чингэлтэй дүүргийн нутаг дэвсгэрт өөрийн төрсөн хүү Х-г олон удаа хутгалж хөнөөсөн хэрэг үйлдсэн юм. Түүний шүүх хурал өнөөдөр болж өндөрлөсөн ч чухам ямар шийд гарсан нь тодорхойгүй байна.

Зам тээврийн сайд А.Гансүх иргэн Л.Даваапилтэй цахим хуудсаар ширүүхэн маргаан өнрүүлсэнтэй холбоотойгоор хуулийн байгууллагад хандсан билээ. Л.Даваапил нь сайдад хандан “Самсунг” корпорацитай нэг километр төмөр замыг хэдээр гэрээлсэн бэ. Тэнд луйвардсан мөнгө чинь наад 3.6 тэрбумаас чин хол байна” гэх мэтчилэн жиргэсэн юм. Хариун нь А.Гансүх сайд ямар нэгэн луйвар хийгээгүй гэдгээ мэдэгдсэн. Улмаар энэ асуудлаар өөрийгөө шалгуулахаар АТГ-т хандсан юм.

Тэгвэл АТГ-аас хариу албан тоот сайдад ирүүлжээ.  АТГ-ын албан тоотод БНСУ-ын Самсунг компанитай “Ухаа худаг-Гашуун сухайт” чиглэлийн төмөр замын суурь бүтцийг барих ажил гүйцэтгүүлэх гэрээг байгуулахдаа А.Гансүхийг албан тушаал, эрх мэдлээ хэтрүүлэн ашиглаагүй, хөрөнгө мөнгө завшсан гэж үзэх үндэслэл байхгүй” гэжээ.

Тагнуулын Ерөнхий Газрын Мөрдөн байцаах хэлтсээс мөрдөн байцаалтын ажиллагаа явуулж шалгасан “Гал үндэстэн холбоо”- ны тэргүүн Ц.Мөнхбаяр нарт холбогдох 201301000361 дугаартай хэрэгт НПГ-аас 2013 оны 12-р сарын 04-ны өдөр Эрүүгийн хуулийн 177-р зүйлийн 177.2, 149-р зүйлийн 149.3, 185-р зүйлийн 185.2,-т заасан яллах дүгнэлт үйлдэж, хэргийг хянан шийдвэрлэх шүүхийн харъяаллыг тогтоолгохоор Улсын Дээд Шүүхэд хүргүүлжээ. Тэгвэл улсын дээд шүүхээс харьяалал тогтоогоод Сүхбаатар дүүргийн шүүхэд шилжүүлсэн юм.

Жаст” группийн захирал асан Ш.Батхүүг хуурамч бичиг баримт бүрдүүлэн уулын баяжуулах “Эрдэнэт” үйлдвэрийг барьцаалан Өмнөд Африкийн “Стандарт” банкнаас их хэмжээний буюу 109 сая ам.доллар залилж, дээрх үйлдвэрт онц их хэмжээний хохирол учруулсан хэрэгт буруутган шалгаж байгаа. Мөрдөн байцаалтын явцад Ш.Батхүү бичиг баримт хуурамчаар үйлдсэн болох нь тогтоогдсон. Түүнийг өнгөрсөн наймдугаар сараас хойш ШШГЕГ-ын харьяа цагдан хорих 461 дүгээр ангид саатуулж байгаа юм. Тэгвэл Ш.Батхүүгийн биеийн байдал муудсан тул цагдан хорих 461 дүгээр ангийн эмнэлгээс Нэгдүгээр эмнэлэгт шилжүүлсэн юм. Тодруулбал, III шатлалын эмнэлэгт эмчлүүлэх шаардлагатай гэдэг эмчийн дүгнэлт гарчээ. Тэрээр хамгаалалт дор эмчлүүлж байгаа бөгөөд эмчлэгч эмч, сувилагчаас өөр хүнтэй уулзуулахгүй байгаа гэнэ. Мөн гар утас хэрэглүүлэхгүй, хэргийг шалгаж байгаа мөрдөн байцаагчаас зөвшөөрөл авч хэн нэгэн уулзах боломжтой байгаа аж.  Өөрөөр хэлбэл, гурван цагдаагаар харгалзуулж байгаа Ш.Батхүү хорих ангид үйлчилдэг бусад дүрэм, журмаар эмнэлэгт ялаа эдэлж байгаа юм.