"Монголын телевизүүдийн холбоо"-ноос жил бүр уламжлал болгон зохион байгуулдаг телевизүүдийн оны шилдгийг шалгаруулах "Алтан шонхор 2013" өнөөдөр болно. Энэ удаагийн наадмын шүүгчдийн бүрэлдэхүүнд Соёлын гавьяат зүтгэлтэн, найруулагч Б.Жаргал, Гавьяат жүжигчин Л.Чаминчулуун, Монголын хэвлэлийн хүрээлэнгийн Гүйцэтгэх захирал М.Мөнхмандах, Харилцаа холбооны зохицуулах хорооны радио давтамж, хяналт зорхицуулалтын албаны мэргэжилтэн О.Цэнд-Аюуш, "МАХIМА" судалгааны агентлагын мэргэжилтэн Т.Энхтунгалаг, "Hero" энтертайнментын захирал Б.Баатар, Соёлын гавьяат зүтгэлтэн, сэтгүүлч Д.Амбасэлмаа, Монголын зураглаачдын ассоциацийн нарийн бичгийн дарга Б.Пүрэвдорж, "Монгол ньюс" агентлагийн захирал Б.Нандинтүшиг нар ажилаж байгаа. Тэд өнөөдөр шилдгүүдийг тайзнаа зарлан "Алтан шонхор" цомыг гардуулах өгөх юм.
 
Тус наадмын шүүгчдийг өчигдөр сонгон шалгаруулсан билээ.

 “Hero” энтертайнментын захирал Б.Баатар хэлэхдээ " Шилдгүүдийг шалгаруулдаг тус наадмыг санаачилсан Монголын телевизүүдийн холбоо,  "NTV" телевизийн захирал М.Уламбадрах бол маш зөв зүйтэй ажил хийсэн. Энэ наадам бол уран бүтээлчдийг дэмжинэ. Мөн тэд өөрсдийгөө би хаана явж байна, юу хийж байна гэдгээ мэдэх том наадам" гэв.

Монголын хэвлэлийн хүрээлэнгийн Гүйцэтгэх захирал М.Мөнхмандах "Өнөөдөр наадмын шүүлтэнд хэн нэгэн, аль нэг телевизийн захирал юм уу, танил талын нөлөө огт орохгүй цэвэр мэргэжлийн шалгуураар шалгаруулалтыг явуулж байна гэдгийг дахин дахин онцолж хэлмээр байна. Миний зүгээс телевизийн мэдээ, мэдээллийн хөтөлбөр хөтлөгчийн номинацид мэргэжлийн зүгээсээ өөрийн үнэлгээ дүгнэлтийг өгч байгаа" гэлээ.
 
Харин Гавьяат жүжигчин Л.Чаминчулуун "Уран бүтээлчдээ үнэлэх үнэлгээний хувьд тодорхой хэмжээгээр ахиц төрлөө. Тэд маш их зүйл хийдэг юм байна. Тэд маш их зүйлийг үзэгчдэдээ зориулах сэтгэл баялаг байдаг юм байна гэдгийг нүдээр харлаа" гэсэн юм.