Энэ онд гааль болон боомт, төмөр замын шалгалт, цагдаа, хил дээр хураагдсан эд зүйлсээс сонирхуулж байна.

Эвэр, цурхай загас: Дорнод аймгийн Чойбалсан сумаас аймгийн төв рүү орох зам болон Чулуунхороот, Чойбалсан чиглэлийн төмөр замд үзлэг шалгалт хийхэд, иргэн Н гэгч нь хууль бусаар агнасан хоёр цагаан зээрийг портер маркийн машинд тээвэрлэж явсан байна. Мөн ачааны төмөр замын вагоноос 46 ширхэг хос эвэр, 9 ширхэг цурхай загасыг тээвэрлэсэн зөрчлүүдийг илрүүлжээ.

Гар утас: Гаалийн ерөнхий газрын харьяа Улс хоорондын шуудан илгээмжийн гаалийн газрын гаалийн хяналтын бүсээр энэ сарын 02 өдөр Монгол Улсын 5 иргэн Солонгос улсаас ирсэн 1403 ширхэг гар утсыг гаалийн хилээр хууль бусаар нэвтрүүлэхийг завдсан. Гар утасны үнийн дүн нь урьдчилсан байдлаар 400 орчим сая төгрөг болж байгаа.

Тарваганы арьс: Чингэлтэй дүүргийн долдугаар хороо Хувьсгалчдын гудамжинд 54 настай эрэгтэй хүн өөрийн амины орон сууцандаа 1000 гаруй тарваганы арьс хадгалсан байсныг илрүүлжээ.

Бугын эвэр: Өнгөрсөн сард мөн БГД-ийн 4-р хороо “Голден Парк” хотхоны орчимд “Hyundai Sоnata-5”, “Хино”, “Hyundai Starex” автомашинуудыг шалгахад  Орхон-Уул аймгийн харъяат иргэн 37 настай эрэгтэй Б гэгч нь 48 настай эрэгтэй А нар нь  тарваганы элдээгүй арьсууд, их хэмжээний бугын эвэр авч явсныг эд мөрийн баримтаар хураан авчээ.

Алт: Өнгөрсөн сарын 19-нд Замын Үүд-Эрээний чиглэлийн олон улсын галт тэргэнд 18 кг алт нуун улсын хилээр хууль бусаар гаргах гэж байсныг Замын-Үүдийн хилийн боомтынхон болоод эрүүгийн цагдаа нар илрүүлсэн. Тэгвэл хэргийг харьяаллын дагуу Тагнуулын ерөнхий газарт шилжүүлээд байгаа аж.

Эм, тариа: Замын-Үүдийн байцаагч нар “Кундам-2" нэртэй хуурамч тариаг хилээр оруулах гэж байсныг илрүүлэв. Энэхүү тариаг Хойд Солонгост үйлдвэрлэдэг хэдий ч БНХАУ-д хуурамчаар бас хийгддэг юм байна.  Нийт 12 сая төгрөгийн үнэ бүхий хуурамч эм, тариа хилээр оруулахыг завдсан дээрх хэргийг Замын-Үүдийн цагдаагийн газарт одоогоор шалгаж байгаа юм.

Хар тамхи: Казахстан улсын иргэн биедээ 200 гр хар тамхи нууж оруулж ирсэн хэрэг өнгөрсөн сард гарч, хууль хяналтынхан саатуулан цагдан хорьсон билээ. Түүнийг онгоцноос буухад нь Буянт-Ухаа дахь Гаалийн газрын гаалийн улсын байцаагчид шалгажээ. Учир нь, зорчигчийн нүдний хүүхэн хараа томорч гөлийсөн байдалтай байсан бөгөөд нүүр хүзүү нь улайсан, маш их хөлөрсөн байжээ. Энэ мэт хар тамхи зөөвөрлөж байгаад баригдах тохиолдол цөөнгүй гардаг.

Тарваганы арьс, бугын эвэр: Замын-Үүдийн чиглэлээр хууль бусаар их хэмжээний тарваганы арьс, бугын эврийг хураан авчээ. Цагдаагийн ажилтнууд тус суманд ажиллаж байсан хятад, монгол иргэдийн чингэлгээс тарваганы 1800 ширхэг арьс, бугын их хэмжээний эвэр илрүүлсэн байдаг. Дээрх гэмт хэрэгт холбоотой байж болох хятад, монгол иргэдийг одоогоор саатуулан шалгаж эхлээд байгаа юм.

бөхөнгийн эвэр: Говь-Алтай аймгийн харъяат 27 настай иргэн Б  их хэмжээгээр нууцаар авч явсныг цагдаагийн албан хаагчид илрүүлэн, саатуулжээ. Түүний авч явсан хууль бус ангын эд зүйлсыг шалгахад хэд хэдэн үнэг, мануулын арьс  байсан аж.

Мөнгөн дэвсгэрт: Улаанбаатар-Эрээн чиглэлийн 686 дугаар галт тэргээр БНХАУ руу зорчиж явсан манай улсын иргэн Д.Шүрэнцэцэг, Б.Батсайхан нар 50-т, 100-тын мөнгөн дэвсгэрт тус бүр 15 мянган ширхгийг хилээр нэвтрүүлэх гэж байсныг илрүүлжээ. Эдгээр иргэд мөнгөн дэвсгэртийг 2008 оноос хойш их, бага хэмжээгээр хил давуулж, БНХАУ-ын иргэдэд худалдаж байгаа бөгөөд ихэнх нь бэлэг дурсгалын зүйлс хийх зориулалтаар гаргаж байна гэж тайлбарладаг аж.

Хаш: Баянхошууны боомтоор  энэ сарын 2-ны өдөр улсын хилээр гарах чиглэлд гаалийн хилээр нэвтэрч байсан БНХАУ-ын иргэн Л-ын EB1612 улсын дугаартай тээврийн хэрэгсэлд гаалийн хяналт шалгалт хийх явцад ногоон өнгийн 7  кг чулуу нуусан байсныг илрүүлж түр саатуулж, дээж аван ГЕГ-ын төв лабораторид шинжилгээнд явуулахад ногоон хаш болох нь тогтоогдсон байна.

Мэс заслын утас: 2013 оны 7 дугаар сарын 15-ны өдөр УБТЗ-ын суудлын вагон депогийн вагоны үйлчлэгч Х нь Эрээн-Улаанбаатар чиглэлийн галт тэрэгний өөрийн ажлын өрөөндөө 90 хайрцаг буюу 1080 ширхэг БНХАУ-д уйлдвэрлэсэн мэс заслын утсыг Монгол Улсын хилээр хууль бусаар нэвтрүүлэхийг завдсан үйлдлийг илрүүлж, таслан зогсоосон байна.

Тэсэлгээний материал: "Улаанбаатар төмөр зам" компанийн Толгойт дахь өртөөний ачих, буулгах хэсгээс 138 тонн  уул уурхайн тэсэлгээний материал үйлдвэрлэхэд хэрэглэдэг түүхий эдийг хураан авчээ. Тээвэрлэгч этгээдүүд вагоноос химийн бодисоо буулгаж, ачааны хоёр автомашин руу зөөж байхад нь барьсан аж.   Тэд тухайн тэсэлгээний бодисоо ОХУ-аас төмөр замаар тээвэрлэн оруулж ирсэн нь тогтоогдсон байна.