Манай улсад сүүлийн хорин жил тохиогоогүй баярт үйл явдал өчигдөр болж дөрвөн ихэр хүүхэд мэндэлсэн билээ. Сэлэнгэ аймгийн Мандал сумын харъяат Баттулга, Хандсүрэн нарын гэр бүлд мэндэлсэн ихрүүдийг гурван охин нэг хүү гэж хэвлэлүүдээр мэдээлж байсан ч энэ ташаа мэдээлэл гэнэ. Ихрүүдийн гурав нь хүү, нэг нь охин аж. Одоогоор ихрүүдийн ээж ЭХЭМҮТ-ийн эрчимт эмчилгээний тасагт хэвтэн эмчлүүлж байгаа бөгөөд нэг хүүхдийг нарийн мэргэжлийн эмч нар эмчилж байгаа гэнэ.

Түүнчлэн хоёр хоногийн дараа Эрүүл мэндийн сайд Н.Удвал очиж хүүхдүүдэд бэлэг гардуулна гэж байсан. Гэсэн ч Н.Удвал сайд тэр болтол хүлээж, тэвчээгүй бололтой. Тодруулбал тэрээр Ерөнхий сайд Н.Алтанхуягийн гэргий Х.Сэлэнгийн хамтаар өнөөдөр ЭХЭМҮТ-д очиж ихрүүдийг эргэсэн байна. Тэд ихрүүдийн эцэг эхэд баяр хүргэхийн зэрэгцээ тус төвийн эмч ажилчдыг ихрүүдэд анхаарал халамж тавьж ажиллахыг үүрэгдсэн бололтой.