Шинэ он гарахад зургаахан хоног үлдлээ. Айл бүр гацуураа засч, гэрээ чимсэн энэ л үед олны танил хүмүүс ямархан гацуур зассаныг 24tsag.mn сайт сонжлоо.
ТВ коктейль хамтлагийн жүжигчин Э.Цолмонбаяр энэ жил гал голомтоо бадраан өрхийн тэргүүн болоод байгаа. Тэрээр ийм сайхан гацуурыг хэнд зориулсан гээч. Мэдээж том охиндоо. Хүүхэдтэй юм уу гэж гайхах хэрэггүй дээ. Эхнэрээ хэлж байгаа юм.
Дуучин Нара бас л сайхан гацуур засчээ. Тэрээр энэ зургийнхаа тайлбарыг "Ёолкоо харахаар нэг л ид шидийн аз жаргалтай мэдрэмж төрөөд байх юм..." гэж сэтгэл догдлуулам бичсэн байна.
УИХ-ын гишүүн С.Бямбацогт энэ жилийн хамгийн “улстөрч” гацуурыг өчигдөр зассан билээ. Тэрээр өөрийнхөө өрөөний үүдэнд гацуур мод засч, түүнийгээ өргөн хэрэглээний барааны үнийг энэ оны долдугаар сарын болон өнгөрөгч арваннэгдүгээр сарын үнэтэй харьцуулсаныг хадсан зургаар чимэглэсэн юм. Тэрээр үүнийгээ "Эдгээр тоо баримт бол эрх баригчдын ард түмэндээ барьж байгаа энэ оны “бэлэг” юм" хэмээн тайлбарлаж байгаа.
"Тимон" нэрээр нэг хэсэгтээ бужигнуулж явсан Рояаль академийн тэргүүн Н.Учрал хүүхдүүддээ ийм гацуур зассан байна. Тэрээр охиндоо амласан ёсоороо 12-р сарын 1-нд гацуураа зассан бөгөөд аав хүний аз жаргалтай мөчийг мэдрээд авчээ.
Хүүе ээ! Энэ гацуурт юу тохиолдоо вэ? Мэдээж хэргийн эзэн хэнгэрэгийн дохиур наана нь зогсож байна. Мөрөөдлийн театрын жүжигчин Г.Алтаншагайн гацуур модыг хүү нь тун ч сүрхий сүйдэлжээ. Ямар сайндаа л "Хөөрхий шалдан мод. Шалдан болгосон хүн нь энэ байна. Үлдсэн хэдийг авах гэхээр арай л хүрдэггүй ээ. Яаая даа" хэмээн аргаа барж сууна.
Хайр дурлалдаа умбан суугаа хөөрхөн А.Ганчимэг буюу Гануухайн гацуур. Түүний хамгийн сүүлд тоглосон “Зэрлэг цэцэгсийн хүлэмж” кино багагүй амжилт олсон бөгөөд энэ киноноосоо тэрээр хойш “хоёр эгч”-тэйгээ Хувьсал продакшнаар овоглох болсон юм.
“Эмоци”-ийн эмоцитой хосууд С.Тэмүүжин, Г.Нарансолонго нарын хүү ингэж цэцэрлэгийнхээ шинэ жилд оролцох юм гэнэ. Тэдний хүүгийн ард жижигхэн ч гэлээ хөөрхөн гацуур нь харагдаад байгаа болохоор тэсэлгүй зургийг нь оруулчихлаа.
Энэ жил хамгийн өвөрмөц чимэглэсэн гацуурын эздээр Дэлхийн аварга, Гавьяат тамирчин Х.Цагаанбаатар, О.Гүндэгмаа нар шалгарч байна. Тэд энэ жил ихрүүдээр бүл нэмж, хоёр хүү, хоёр охинтой өнөр айл гэр болсон бөгөөд энэ жил хүртсэн медалиудаараа сүлд модоо чимэглэсэн юм.
Сүүлийн үед жиргээнд гэхээс бусдаар нам гүмхэн байх болсон дуучин Хаянаа энэ жил цагаахан сүлд засчээ. Тэрээр “өглөөний мэнд” хүргэхийн ялдамд ийнхүү сүлд модоороо жиргээд авсан юм.
Жүжигчин Золоогийн энэ жил охиндоо зассан сүлд мод. Харин түүнийгээ өөрийн цахим хуудаснаа нийтлэхдээ тав тух мэдрүүлэм өөрийнхөө зурагтай нийтэлжээ.
А.Анар
Сэтгэгдэл (4)