УИХ-ын гишүүн Ж.Батсуурьт холбогдох сонгуулийн хууль тогтоомж зөрчсөн хэргийг Нийслэлийн прокурорын газраас Сүхбаатар дүүргийг шүүхэд шилжүүлсэн байна.

 Жамъянсүрэнгийн Батсуурь нь МАН-аас УИХ-ын сонгуулийн 6 дугаар тойрогт буюу Дорноговь, Говьсүмбэр аймагт нэр дэвшиж сонгуулийн сурталчилгааны үеэр 2012 оны 06 дугаар сарын 24-ний өдөр Говьсүмбэр аймгийн Сүмбэр сумын 5 дугаар багийн нутаг орчим Жарангийн худаг, Цайдам гэх газарт сонгогчидтой уулзах үеэр УИХ-ын сонгуулийн тухай хуулийн 35 дугаар зүйлийн 35.15.1 дэх хэсэгт “...Сонгогчид мөнгө, эд бараа төлбөргүй тараах, хөнгөлөлттэй үнээр худалдах, аливаа үйлчилгээ төлбөргүйгээр болон хөнгөлөлтэйгээр үзүүлэх, төлбөрт таавар, бооцоот, мөрийтэй тоглоом зохион байгуулахыг хориглоно...” гэсэн заалтыг зөрчиж, “Намайг болон Монгол ардын намайг дэмжээрэй” гэж иргэн Т.Батжаргал, Ч.Баярсайхан, Ш.Алтангэрэл, Г.Чойдовдаш, Д.Цогзолмаа нарт тус бүр 100.000 төгрөг, Г.Санжаад 40.000 төгрөг өгч, иргэн сонгуулийн эрхээ эдлэхэд саад хийсэн аж.

Тухайн хэргийн талаар Нийслэлийн Прокурорын орлогч Ц.Батболдоос тодруулахад "Энэ хэрэг Улсын дээд шүүхээр харьяалалын тогтоолгочихсон байгаа. Одоогоор шүүгдэгчийн бүрэн эрхтэй холбоотой асуудал байгаа учир бид хэргээ шүүхэд шилжүүлж чадахгүй байна. Ер нь УИХ-ын гишүүн Ж.Батсуурь шүүхэд өөрөө очвол бид энэ хэргийг шүүхээр шийдвэрлүүлэх боломжтой болно гэж үзэж байгаа" гэв