Шинэ халаадаа өмсөөрэй,
Ширээний бүтээлгээ солиорой... хэмээх үгээрээ та бидний зүрх сэтгэлд хоногшсон ахмад жүжигчин Шатарын Цэцэг өнөөдөр Монгол Улсын Гавьяат жүжигчин боллоо.

Тэрээр "Ховор хүмүүс", "Тэмцэл", "Хааны сүүлчийн хатан", "Гарын таван хуруу", "Өглөө" зэрэг олон кинонд дүр мөнхөлсөн бөгөөд "Зуслангийн чөтгөр", "Еэ еэ, шар Будаа" зэрэг 20-иод кинонд гол болон туслах найруулагчаар ажиллаж, олон зуун киноны дүрд дуу оруулсан ахмад уран бүтээлч юм.

Түүнийг "Тунгалаг тамир" киноны Хонгорын дүрээрээ үзэгч түмний хайр хүндэтгэлийг хүлээсэн алдарт найруулагч Н.Нямдаваагийн гэргий гэдгээр  нь олон хүн мэдэх биз. Цөөхөн хэдэн уран бүтээлч гэр бүлүүдийн нэг энэ гэр бүлийн бүх гишүүд кинотой ямар нэг байдлаар холбоотой.

Тухайлбал том хүү Н.Бадрал нь "Би чамд хайртай" киноны Баяраагийн дүрээрээ одоо ч ард түмэндээ нэрлэгдсээр явна.  Харин бага хүү Н.Бат-Амгалан нь дөнгөж гуравхан настайдаа  “Дэгдээхий нас” киноны гол дүрийг бүтээж, жаахан томроод "Гарын таван хуруу" киноны бага хүүгийн дүрийг бүтээж байсан юм.