Нийслэлийн прокурорын газраас онц хүнд, ээдрээ төвөгтэй, олон нийтийн анхаарал татсан 65 хэрэгт прокурорын яллах дүгнэлт үйлдэн шүүхэд шилжүүлсэн талаар өчигдөр мэдээлсэн.

 Шүүхэд шилжүүлсэн хэргүүдийг үзэхэд 14 нь хүндрүүлэх бүрэлдэхүүнтэй бусдын амь насыг хохироосон, 12 нь бага насны хүүхэд хүчиндсэн, 7 нь авлига, албан тушаалын, 5 нь мансууруулах болон сэтгэцэд нөлөөлөх эм бэлдмэлийг хууль бусаар олж авсан, хадгалсан, борлуулсан, аймаг, нийслэлийн дүүрэг дамжсан олон үйлдэл, яллагдагчтай хулгай, дээрэм, залилангийн 4, байгаль хамгаалах журмын эсрэг 2 хэрэг байгааг ч онцоллоо. Мөн энэ үеэр Нийслэлийн прокурорын орлогч Ц.Батболдоос МИАТ-ийн хэргийг бидэнд анх мэдээлэхдээ мөнгө угаасан хэмээн мэдээлж байсан бол хэргийг шийдвэрлэж, ял өгөхдөө мөнгө угаагаагүй хэмээн ял хөнгөрүүлж байсан. Энэ дээр та нар ямар байр суурьтай байна хэмээн асуусан юм. Тэгвэл Ц.Батболд хэлэхдээ "Мөнгө угаахтай холбоотой хэд хэдэн хэрэг шалгагдаж байгаа. Мөрдөн байцаалтын явцад ямар нэг мэдээлэл өгөх боломжгүй. МИАТ-ийн хэргийн хувьд прокуророос мөнгө угаасан хэмээн зүйлчилсэн. Харин Дээд шүүхийн ажиллагааны явцад энэ зүйлчлэл өөрчлөгдөж, шийдвэрлэгдсэн. Өөрөөр хэлбэл хуулийн нэмэлт өөрчлөлттэй холбоотой ингэж шийдвэрлэсэн болов уу гэж ойлгосон. Гэхдээ энэ талаарх мэдээллийг Дээд шүүхээс авна уу" гэсэн юм.