БНСУ-ын хөрөнгө оруулалттай "Ионсей" эмнэлгийг Мэргэжлийн хяналтын ерөнхий газраас хаасан талаар мэдээллийг бид хүргэж байсан. Тэгвэл "Ионсей" эмнэлгээс ямар учраас хаасныг тодруулахад "Дотоод засвартай учир ирэх сарын 6-нийг хүртэл ажиллахгүй" гэсэн юм.

Харин Мэргэжлийн хяналтын газрын албаны эх сурвалжаас энэ талаар тодруулахад ""Ионсей" эмнэлгийн мэс заслын болон дурангийн үзлэг, оношилгооны тусламж үйлчилгээг 2013 оны 12 дугаар сарын 23-ны өдрөөс эхлэн бүр мөсөн, эмнэлгийн үйл ажиллагааг бүхэлд нь шалгалтаар илэрсэн зөрчил дутагдлыг бүрэн арилгах хүртэл хугацаагаар түр зогсоохоор шийдвэрлэсэн. Тус газраас 2013 оны 10 дугаар сард мэс заслын үйл ажиллагааг түр зогсоож, аравдугаар сарын 23-ны өдөр улсын ахлах байцаагчдын албан шаардлагаар хугацаатай үүрэг өгсөн бөгөөд энэ сарын 17-ны өдөр 05/042/240 тоот албан шаардлагын хэрэгжилтийг Ионсей-Найрамдал эмнэлэгт эмнэлгийн удирдлагуудыг байлцуулан шалгахад албан шаардлагын хэрэгжилт  хангалтгүй, үүрэг даалгаврыг хэрэгжүүлэх ажлын төлөвлөгөө гаргасан боловч 2014 оны 1 дүгээр улиралд гүйцэтгэхээр төлөвлөж, хугацаат үүрэг даалгаврыг хэрэгжүүлэх талаар дорвитой арга хэмжээ аваагүй байсан.

Мөн гүйцэтгэлийн шалгалтаар Дурангийн мэс заслын тусламж үйлчилгээний стандарт, удирдамж батлуулах, эмнэлзүйн туршилт явуулах зөвшөөрлийг Эрүүл мэндийн асуудал эрхэлсэн төрийн захиргааны төв байгууллага болон анагаах ухааны ёс зүйн хороонд хандаж аваагүй, дурангийн багажийг угааж халдваргүйтгэх, ариутгахдаа хэрэглэх арга, аюулгүй ажиллагааны баталгаажсан зааврын дагуу тусдаа өрөөнд /ариун бүсэд/ угааж, ариутгах шаардлага хангаагүй, ариутгалын тасаг нь эрүүл ахуй, халдвар хамгааллын шаардлага хангаагүй, эмнэлгийн тоног төхөөрөмжийн шинэчлэл хийгээгүй, хангамж хүрэлцээгүй, орон тооны инженер, техникчгүй, мэс заслын тусламжийг үзүүлэхтэй холбогдуулан мэс засалд бэлтгэсэн байдал, мэс заслын явц, өвчтөнг эрчимт эмчилгээ, мэдээгүйжүүлгийн эмчийн, мэс засалчийн болон хүүхдийн эмчийн хяналтгүй орхисон зэрэг олон зөрчлүүд илэрсэн. Үүгээр зогсохгүй тус эмнэлгийн удирдлага, эмнэлгийн мэргэжилтнүүд улсын байцаагчийн албан шаардлагыг биелүүлэх талаар заасан хугацаанд тодорхой ажил зохион байгуулаагүй нь Монгол улсын “Төрийн хяналт шалгалтын тухай” хуулийн 16.1.2 дахь заалтыг тус тус зөрчин ажиллаж, үйл ажиллагаандаа ахиц өөрчлөлт гаргаагүй хэвээр байсан.  Иймээс “Төрийн хяналт шалгалтын тухай” хуулийн 10 дугаар зүйлийн  10.9.7 дахь заалтыг үндэслэн үйл ажиллагааг нь түр зогсоосон" гэв.