Архи согтууруулах ундааг хэтрүүлэн хэрэглэсэн иргэдийг эрүүлжүүлэх байранд авчирдаг. Ингэснээр тухайн иргэн гэмт хэрэг зөрчилд холбогдох, цаашлаад амь насаараа хохирох эрсдлээс урьдчилан сэргийлдэг учиртай. Тэгвэл цагдаагийн тухай хуулинд нэмэлт өөрчлөлт, шинэчлэлтүүд орсоноор оны эхний өдрөөс эрүүлжүүлэх байрыг татан буулгаж оронд нь хордлого тайлах төв, албадан саатуулах байрыг бий болгохоор болсон. Өөрөөр хэлбэл,  "Эрүүлжүүлэх байр нь цагдаагийн төв байгууллагын харьяалалд ажиллана" гэдэг заалтыг  "Эрүүл мэндийн асуудал эрхэлсэн төрийн захиргааны" болгон өөрчилжээ. Мөн "цагдаагийн алба хаагч" гэснийг "түргэн тусламжийн төвийн ажилтан, эрүүлжүүлэх байрны ажилтан"  гэж өөрчилсөн байна.

Тэгвэл нэгэнт батлагдсан энэ хууль хэрэгжих боломжгүй мэтээр ард иргэдэд ойлгогдож, зарим асуудлыг дагуулах боллоо.

Эмнэлгийн ажилчид "энэ хуулийг боловсруулахдаа биднээс санал аваагүй. Үнэхээр л иргэдийнхээ эрүүл мэндийн төлөө гэсэн бол эрүүлжүүлэх байрны орчин, нөхцлийг сайжруулах шаардлагатай. Биеэ авч явах чадваргүй болсон, амь насанд нь аюул учирсан согтуу хүмүүст эрүүл мэндийн байгууллага үйлчилсээр ирсэн. Нэрийг нь өөрчилж, эрүүлжүүлэх биш хордлого тайлах төв гэх хэрэгтэй. Эрүүлжүүлэх байр ажлуулахад шаардлагатай  санхүүжилт, тэнд ажиллах хүмүүсийн цалин тодорхой байх ёстой" гэж тэд үзэж байгаа юм.

Харин ажлын хэсгийн эрүүлжүүлэх байрыг  дүүргүүдийн Эрүүл мэндийн нэгдэлд шижлүүлэхээр төлөвлөсөн. Харин үүнийг дүүргүүдийн Эрүүл мэндийн нэгдэл ч эсэргүүцэж байгаа юм. Учир нь дүүргийн Эрүүл мэндийн нэгдлүүд өөр өөр статустай, зарим нь  хувьчлагдсан, зарим нь дүүргийн эмчлүүлэгчдийг хэвтүүлж эмчлүүлэх ч оргүй байдаг билээ.

Уг нь манай улс эрүүлжүүлэх байр, эрүүлжүүлэх ажлыг цагдаагаас салгаж, эрүүл мэндийн байгууллагад өгөх талаар 1994 оноос ярьж эхэлсэн ч яриа төдий байсаар ирсэн юм.  Улмаар нэрнээс нь аваад үзсэн ч эрүүлжүүлэх байрыг эрүүл мэндийн байгууллагад харьяалуулах ёстой гэж цагдаагийнхан үздэг бол эрүүл мэндийн салбарт ажиллагсад согтуу, хөлчүү, ааш авир нь дийлдэхгүй хүмүүсийг бид хариуцахгүй гэдэг.

Архидан согтуурч, гэр бүлийнхээ болон нийгмийн амгалан, тайван байдлыг алдагдуулж, хэрэг төвөг хийчих гээд байгаа хүмүүсийг эмч нар дийлэхгүй нь мэдээж.  Гэлээ гээд иргэдийг эрүүлжүүлэх, хордлого тайлах үүргийг цагдаа нар бүрэн гүйцэтгэхгүй нь ойлгомжтой.

Юутай ч хууль өчигдрөөс хэрэгжээд эхлэх учиртай ч хүндрэл бэрхшээлүүд ийн гарсаар, олон шүүмжлэлийг дагуулсаар байна.