МОНЦАМЭ агентлагийн дэргэдэх “Хүмүүн бичиг” сонины газраас жил бүр уламжлал болгон зохион явуулдаг “Монголын сайхан бичигтэн - 2013” улсын уралдаанд амжилттай оролцож байр эзэлсэн сайхан бичигтнүүд өнөөдөр Ерөнхий сайд Н.Алтанхуягаас шагналаа гардан авлаа. 17 дахь жилдээ амжилттай зохион байгуулагдаж буй тус уралдаанд энэ жил Баян-Өлгий, Сүхбаатар аймгаас бусад бүх аймаг, нийслэлийн дүүргээс нийт 1000 шахам хүн оролцсон юм.
Энэхүү уралдааны хамгийн өрсөлдөөнтэй төрөл бол уран бичлэгийн төрөл. Энэхүү төрлийн нэгдүгээр байрт Сүхбаатар дүүргийн 13-р хорооны иргэн, зураач-уран бичээч Ц.Бямбажав шалгарч Хайнань аралд хүссэн үедээ амрах эрхийн бичгийн эзэн болсон бол “Бичиг соёл” төвийн уран бүтээлч Э. Анхбаяр, нийслэлийн Хан- Уул дүүргийн 114-р сургуулийн бага ангийн багш Б.Оюунцэцэг удаах байруудыг эзэлжээ.
Ингээд үлдсэн ангилалуудад байр эзэлсэн сайхан бичигтнүүдийг танилцуулж байна.
Мэргэжлийн багш нарын ангилалд: Дархан -Уул аймгийн “Одон” цогцолбор сургуулийн монгол хэл, уран зохиолын багш Б.Бүжинлхам тэргүүн байр эзэлж, Нийслэлийн 49-р дунд сургуулийн багш Б.Пүрэвсүрэн, Нийслэлийн “Монген” цогцолбор сургуулийн багш З.Алтаннавч нар хоёр, гуравдугаар байр эзлэсэн байна.
Насанд хүрэгчдийн ангилалд: МУИС-ийн МХСС-ийн эх бичиг судлалын 4-р ангийн оюутан Т.Түмэндэмбэрэл тэргүүн байр эзэлж, МУБИС-ийн Гадаад хэлний сургуулийн орос- монгол хэлний 1-р ангийн оюутан 3. Бямбасүрэн, “ Орхон” их сургуулийн монгол хэл, уран зохиолын багшийн 2-р ангийн оюутан Б.Сувд нар удаахь байрт шалгарсан юм. усгай байрт Хөвсгөл аймгийн “Эрдмийн далай” сургуулийн дүрслэх урлагийн багш Т. Санжсүрэн, Дархан -Уул аймгийн 15-р сургуулийн бага ангийн багш Б.Навчаа нар оржээ.
11 дүгээр ангийн сурагчдын ангилалд: Нийслэлийн “Монген” цогцолбор сургуулийн 11-р ангийн сурагч Ц.Анударь, Архангай аймгийн Хайрхан сумын сургуулийн 11-р ангийн сурагч Т.Жавзанпагма, Төв аймгийн Сүмбэр сумын дунд сургуулийн 11-р ангийн сурагч Э.Нямжаргал, Ховд аймгийн “Цаст алтай” цогцолбор сургуулийн 11- р ангийн сурагч Г.Ургамал нар тэргүүн байр эзэлж Засгийн газрын буцалтгүй тэтгэлгээр МУИС, МУБИС-д 4 жил суралцах эрхийн эзэд боллоо.
Сурагчдын ангилалд: 1-р байрт Нийслэлийн 51-р сургуулийн 9-ийн “б” ангийн сурагч С.Билэгсайхан шалгарч, Дархан -Уул аймгийн 15-р сургуулийн 9-ийн “д” ангийн сурагч Ц. Бадамцэцэг, Төв аймгийн “Хүмүүн” цогцолбор сургуулийн 9-ийн “г” ангийн сурагч Д.Мягмарсүрэн нар хоёр, гуравдугаар байрт шалгарав. Тусгай байрт, Нийслэлийн “Улаанбаатар” дунд сургуулийн 8-р ангийн сурагч Э.Анужин, Хөвсгөл аймгийн Жаргалант сумын дунд сургуулийн 8-ыг “а” ангийн сурагч А.Машбат нар шалгарсан юм.
Уралдааны бичвэрийн бус ангилалд: Дундговь аймгийн Сайнцагаан сумын 3-р сургуулийн багш монгол хэл, уран зохиолын багш Д.Отгонсүрэн түрүүлж, Нийслэлийн 23-р дунд сургуулийн 10-ын “а” ангийн сурагч Ц.Анужин, Г.Батжавхлан нар удаалав.
Түүнчлэн уламжлал болсон УИХ-ын гишүүн Л.Энх-Амгалангийн нэрэмжит шагналыг Соёл урлагийн их сургуулийн морин хуурын 2-р ангийн оюутан Б. Шаравнямбууд хүртсэн юм.
А.Анар
