Иргэн аж ахуй нэгжийн тарьсан ойг төр худалдан авч, улсын ойн санд шилжүүлэх тухай удтал яригдаж байсан.

Тэгвэл энэ талаархи журам батлагдан гарсан байна. Тодруулбал иргэн аж ахуй нэгж байгууллага нь мод бэлтгэсэн талбай, ойн түймэр, хөнөөлт шавьж болон бусад байгалийн гамшигт өртсөн талбайд мод тарьж ургуулсныгаа улсад худалдаж болох аж.

Ингэхдээ тухайн сум, дүүргийн Засаг даргадаа ойгоо худалдах хүсэлт гаргах ба Засаг дарга болон ойн анги жил бүрийн 8 дугаар сард багтаан аймаг, нийслэлийн Байгаль орчны газарт мэдээллийг хүргүүлэх юм. Аймаг, нийслэлийн Байгаль орчны газар нь Засаг даргын захирамжаар ажлын хэсэг гарган иргэдийн тарьсан ойд тооллого явуулж, чанар үр дүнг нь шалгаад худалдан авах, эсэх тухай акт үйлдэх юм байна. Тооллого явуулахдаа таримал ойд жишиг талбай байгуулан шалгуур үзүүлэлтийг тодорхойлно.

Харин тухайн зарах гэж байгаа таримал ойн талбай нь 05 га-гаас багагүй, үр ба тарьц, суулгацаар ойжуулалт хийснээс хойш 5-аас дээш жил арчилж ургуулсан, 8 ба түүнээс дээш настай байх зэрэг шалгуурыг хангах хэрэгтэй аж. Ойт хээрийн бүсэд 0.5 га-д 700, тал хээрийн бүсэд 500, говь цөлийн бүсэд 300-гаас багагүй ширхэг мод тарьсан байх шаардлагатай юм.

Үнийн хувьд нэг га таримал ойг нэг сая төгрөгөөр үнэлжээ. Гэхдээ модны төрөл, тоо болон ямар бүсэд тарьснаас шалтгаалан үнийн хэлбэлзэл өөр өөр байна. Өөрөөр хэлбэл,  модны төрөл, тоогоор  ангилж итгэлцүүрийн үнэ гаргасан байна. Тухайлбал, жодоо, тоорой, жигд, сухай зэрэг үнэт үйлдвэрийн модны 1-га дахь таримлыг  1.5 сая, бут сөөгийг 900 мянга төгрөгөөр төр худалдаж авах юм. Худалдах таримал ойн 0.5 га дахь модны хамгийн бага тоо нь 300 ширхэг байх бөгөөд үүнээс олон болох тусам худалдах үнэ нь өсөх аж.