Барилгын бүтээн байгуулалт нийслэлийн өнгө үзэмжийг чимж байгаа ч иргэдийн амь насанд заналхийлж эхэллээ. Энэхүү “заналхийлэл”-ийг 24tsag.mn  баримт дурдан эрх баригчидад сануулж байна!

1.    2012 онд УИХ-ын гишүүн Б.Чойжилсүрэнгийн бариулсан “Рапид харш” орон сууцны барилгын краны 26 настай жолооч амь насаа алдав. Учир нь барилгын ажилд хэрэглэж байсан кран хугарч унаснаас энэхүү эмэгнэлтэй хэрэг болов. Азаар унаж буй краны ойр ямар нэгэн зүйл байгаагүй юм.
 
2.    2012 оны 9 сард Шастины нэрэмжит III эмнэлэгийн баруун талд барилгын кран машин дээр унаж нэг хүүхдийн аминд хүрэв. Бас нэг хүүхдийг хүнд гэмтээв. Хөдөлгөөнд оролцож байсан хэд хэдэн автомашин эвдэрч сүйрсэн юм. Краны жолооч нь Хятадын иргэн байсан бөгөөд бага зэрэг иргэдийн мөргөлдөөн болсон удаатай. Энэ хэрэгт “MUDI”,  “Төгс гүрэн”, “Орд гео”, “Премиум конкрете”, “Буянт трак” гэх мэт компаниуд нэр холбогдсон юм.

3.    2012 оны 10 сарын 6-ны өдөр. Тэнгис кино театрын хажууд баригдаж буй  “Эко констракшн”-ы барилга дээрээс төмөр унаж 20 настай оюутан залуугийн аминд хүрэв. Зөвшөөрөлгүй гэж дуулиан дэгдээж байсан энэ барилгын эзэмшигч болох “Эко констракшн” ямар хариуцлага хүлээсэн нь бас л тодорхойгүй үлдэв.

4.    2013.01.07. Гэсэр сүмийн баруун талд байрлах “Макс Өргөө” компанийн “MAX Tower”-ийн барилгын дээрээс төмөр унаж ажлаа гүйцэтгэж явсан жолооч амиа алдав. Талийгаач 3139 УНР улсын дугаартай Ланд 200 маркийн автомашин унаж явсан бөгөөд дээрээс унасан төмөрт дарагдсан юм. Харин уг барилгыг захиалагч “Макс өргөө” ХХК өчигдөр орой мэдэгдэл гаргав. Уг мэдэгдэлд “барилгын ажлын явцад хөдөлмөр хамгаалал, аюулгүй ажиллагааны горим, стандарт мөрдөгдөж байгаа эсэхэд хяналт тавих үүргийнхээ дагуу шалгалт хийн илэрсэн зөрчлийг арилгах талаар шаардах хуудас хүргүүлэх, барилгын ажлыг зогсоох зэрэг арга хэмжээ авч байсан хэдий ч өнөөдөр ийм харамсалтай осолд хүрсэнд гүнээ ухамсарлаж байна. Ослын мөрөөр мэргэжлийн болоод хууль хяналтын байгууллага шуурхай ажиллаж, нөхцөл, шалтгааныг тодруулах, хариуцлага тооцох арга хэмжээг эхлүүлээд байгаа болно” хэмээн онцлов. Өөрөөр хэлбэл бид хамаагүй гүйцэтгэгч хариуцлага хүлээнэ гэж шууд зарласан хэрэг л дээ.

5.    2013.06.14. Баруун дөрвөн зам Гранд плазагийн замын хойно баригдаж буй барилгаас тулгуур төмөр зогсоолд байсан хоёр авто машин дээр унав. Азаар машинд хүн байсангүй.

6.    Өнгөрсөн онд Төв шуудангийн өмнө баригдаж байсан барилгаас төмөр унаж нийтийн тээврийн автобусны дээврийг цоолов. Хэрэв том төмөр байсан бол нилээд хэдэн зорчигчийн аминд хүрэх байлаа гэж шуугиад өнгөрсөн.

7.    Мөн гудамаар алхаж явсан УИХ-ын гишүүн Ё.Отгонбаярын хажууд барилгын төмөр унаж дуулиан дэгдээж байсан. “Хоёрхон алхамын хойно явсан бол толгой дээр унах байлаа” хэмээн Ё.Отгонбаяр гасалж явсан. Бодвол тэнгэр нь харж, аз нь тэтгээ биз.

8.    Тэгвэл энэ бүхнээс ч илүү ноцтой тоо баримтыг хүргье. 2012 оны орон нутгийн сонгуулийн үеэр АН-аас гаргасан судалгаа олон зүйлийг өгүүлсэн юм. Даанч сонгуулийн үе байсан учир тоолгүй өнгөрсөн. 2012 оны 11 сарын 16-нд нийтлэгдсэн “Иргэдлийн мөрөөдлийг няцлагчид эндээс л төрдөг-2” нийтлэлийн баримтаас үзвэл барилгын осолоор 2007 оноос хойш нийт 109 хүн нас бараад байна. Тухайлбал 2007 онд барилгын 73 осол гарч 40 хүн, 2008 онд 73 осол гарч 18 хүн, 2009 онд 43 осол гарч 11 хүн, 2010 онд 37 осол гарч 21 хүн, 2011 онд 46 осол гарч 19 хүн, 2012 онд 39 осол гарч 22 хүн өөд болжээ. Ингээд нийт 108 гэсэн тоо гарч. Үүн дээр өчигдөрийн осолыг нэмэхээр 109 болж байна. Мэдээж 2012 оны 11 сараас хойш олны анхааралд өртсөн дээрх баримтуудаас гадна нилээд осол гарсан. Тэр бүхнийг нэмэхээр багагүй тоо гарна. Эдгээр тоо баримтад эрх баригчидаас гадна эрхэм барилгын бизнес эрхлэгчид анхаарал хандуулах цаг боллоо!