Барилгын компаниуд болоод захиалагч байгууллагууд хөдөлмөрийн аюулгүй байдлыг хангаж ажиллаж, ажиллуулж чаддагүй. Үүнээс үүдэлтэй осол аваар ихээр гардаг нь нууц биш.

Тэр дундаа урин дулааны улиралд барилгын ажил ид хийгддэг учир энэ үеүдэд осол аваар гарч хүн бэртэж, эндэх, амь насаа алдах тохиолдол гарсаар байдаг. Тэгвэл арваннэгдүгээр сараас барилгын үйл ажиллагааг бүрэн зогсоох хууль манайд бий. Тиймээс ч энэ төрлийн хэргүүд өвлийн улиралд багасдаг учиртай.  Гэтэл  хууль дүрмээ биелүүлэхгүй, зөвхөн өөрсдийн ашиг сонирхолыг бодсон зарим компаниудаас болж дахин хүний амь эрсэдлээ.

Тодруулбал, өчигдөр өглөө 10.30 цагт Чингэлтэй дүүргийн нутаг дэвсгэр Гэсэр сүмийн баруун талд байрлах “Макс Өргөө” компанийн “MAX Tower”-ийн барилгын дээрээс төмөр унаж хүний амь нас эрсэдсэн нь олныг цочирдууллаа. Тус барилгын 20 давхраас унасан бэхэлгээний төмөрт 3139 УНР улсын дугаартай  “Ланд 200” маркийн автомашин өртөж жолооч газар дээрээ нас  барсан юм. Осолд өртсөн хохирогч Эдийн Засгийн хөгжлийн яамны жолооч байсан юм.  Тухайн үед компанийн ажил гүйцэтгэж байсан “Magic classic” компанийн гадна пссатны өргөгчний цамхагийн бэхэлгээний төмөр замын хөдөлгөөнд ийн унаж ослыг гаргасан гэж ярьж байгаа ч ослын дүгнэлт  хараахан гаргаагүй байгаа билээ.

Юутай ч тухайн барилгын  ажил хийгдэх зөвшөөрөлтэй байсан уу, шаардлага хангахаар ажиллаж байсан уу гэдгийг тогтоохоор Мэргэжлийн хяналт ажиллаж байгаа юм. Мөн барилгаас төмөр унаж осол гарахад тухайн барилга дотор хятад ажилчид байсан бөгөөд ослын үеэр тэднийг микро автобусаар авч явцгаасан талаар эх сурвалж баталж байна. Мэдээж осол гарсан, хүний амь эрсэдсэн газарт тухайн хэрэгт холбоотой байж мэдэх бүх хүмүүсээс мэдүүлэг авч, сэжигтнээр тооцон шалгана. Тэр дундаа хөдөлмөр аюулгүй байдлын инженер тухайн хэрэгт татагддаг. Тэгвэл "Макс грүпп"-ийн барилгаас төмөр унаж осол гаргасан учир тэдний удирдлага, ажилчдыг ч шалгаж, мэдүүлэг авах юм.

Ингээд барилга дээр гарч байгаа ослын талаар ЦЕГ-ын хэвлэл мэдээллийн ажилтан Ч.Лхагвасүрэнгээс тодрууллаа.

-Барилга дээр осол гарлаа гэх мэдээлэл өвлийн улиралд ч мэр сэр сонсогдсоор байна. Хэрэв барилгын ослоос болж хүн бэртэх, амь насаараа хохирсон тохиолдол хэн хариуцлага хүлээх вэ?
-Хөдөлмөр аюулгүй байдлаас үүдэлтэй хэрэг бол яах аргагүй тухайн байгууллагын болоод хувь хүний хариуцлагаас болдог.  Тухайн барилга дээр барилгын инженер, аюулгүй байдлын инженер, хөдөлмөр аюулгүй байдлын инженерүүд томилогдон ажиллах ёстой.

Мөн тухайн барилгын компани ямарваа нэг байгууллагаар ажлаа гүйцэтгүүллээ гэхэд аль аль талаас нь инженер гарч эл барилгад хяналт тавих ёстой. Гүйцэтгэж байгаа компанид ч барилгын инженер, талбайн инженер, хөдөлмөр аюулгүй байдлын эрх бүхий инженер гэж байх ёстой. Эдгээр нь нийлж тухайн барилгад хяналт тавих үүрэгтэй. Хөдөлмөр аюулгүй байдлын инженер тухайн ажилчид хөдөлмөр аюулгүй ажиллагааныхаа дүрмийг сахиж байна уу?.Өндөр дээр ажиллахад бэхэлгээгэн хийж байна уу, бэхэлгээний стандартыг биелүүлж байн уу гэдгийг хянах ёстой.

Өглөө ажилд нь гарахад нь тухайн инежер бүгдийг нь шалгаад зааварчилгаа өгч гарын үсэг зуруулсан байх шаардлагатай. Хэрэв хөдөлмөр аюулгүй байдлын инженер энэ бүхнийг хийгээгүй бол хариуцлага хүлээж эрүүгийн хэрэг үүсгэгдэнэ. Өөрөөр хэлбэл, албан тушаалдаа хайнга хандсан гэдгээр эрүүгийн хэрэг үүснэ.

-Хэрэв тухайн байгууллага хөдөлмөр аюулгүй байдлын инженергүй, авч ажилуулаагүй бол яах вэ?
- Хэрвээ тийм хүн байхгүй буюу тухайн компани ийм ажилтан томилоогүй бол компанийн захирал хариуцлага хүлээнэ. Заавал ийм албаны хүн байх ёстой гэсэн дүрэм байхад үүнийг биелүүлээгүй тохиолдолд захирал буюу барилгыг хариуцаж байгаа хүн хариуцлага хүлээх ёстой.

-Барилгын осол аваарт ихэвчлэн хэд орчим насны хүмүүс өртөж байна вэ?
-Дандаа хөдөлмөрийн насны залуучууд амь үрэгдэж нэг бол бэртэж байна. Үнэхээр яах аргагүй анхаарал хандуулах асуудал бол энэ. Өчигдрийн нас барсан хүн ч залуухан 35 настай хүн байсан.