Энэ долоо хоногт хууль, шүүхийн байгууллагын шинэчлэлтэй холбоотой олон асуудал иргэдийн анхаарлыг татаж байна. Хууль, шүүх, цагдаагийн байгууллагыг шинэчлэхэд дор хаяж 6-7 жил хэрэгтэй гэж байгаа ч салбарын сайд нь аль хэдийн ажлаа эхлүүлсэн хэмээн ярьж байна. Тиймээс ч энэ долоо хоногийн УИХ-ын чуулганы хуралдаанаар хууль, шүүхийн шинэчлэлтэй холбоотой олон хуулийн төсөл хэлэлцэгдэх юм. Ер нь тус салбарыг шинэчлэхэд толгой эргэм замбараагүй олон зүйлийг цэгцлэх шаардлагатай гэж Хууль зүйн сайд Х.Тэмүүжин хэлж байна. Түүний нэг нь шоронгуудыг нэгтгэх ажил. Монгол улс нийт 25 шоронтой. Гэтэл манай улсын хэмжээнд гурван шорон байхад л хангалттай гэж Х.Тэмүүжин сайд үзэж байгаа аж. Тэрбээр шоронг ингэж өөрчлөхөөр төлөвлөж буйгаа бидэнд дуулгалаа.

1.    Монгол улс дахь 25 шоронг багасгаж гурав болгоно.

2.    Тус төвлөрсөн гурван том шорон нь баруун, зүүн, төвийн бүсүүдэд хуваагдаж байрлана.

3.   Төвийн бүсийн шорон нь “Ургах наран” хорооллын ойролцоо баригдаж байгаа бөгөөд энэ ондоо багтааж ашиглалтанд оруулахаар төлөвлөж байгаа аж.

4.    Нэг шоронд дор хаяж 1500 хоригдлыг төвлөрүүлнэ. 

5.   Одоо үйл ажиллагаа явуулж буй 25 шорон нь жилд төсвөөс 24 тэрбум төгрөг авдаг. Тиймээс төвлөрсөн гурван шоронтой болвол дээрх мөнгөнөөс 14 тэрбумыг хэмнэх юм байна. Өөрөөр хэлбэл урсгал зардал багасах юм байна.

6.   Төвлөрсөн шорон бүр үйлдвэртэй байна. Үйлдвэрт хоригдлууд ажиллаж орлого олж, урсгал зардлаа нөхдөг болохыг холбогдох хуульд хуульчилж өгөх юм байна.

7.    Шоронг шинэчлэхийн тулд хууль тогтоомжоо тодорхой болгож, боловсон хүчин, дэд бүтцийн ажлыг нэн тэргүүнд хийх юм байна.

8.    Хүүхдийн, дамжин хорихийг төвлөрсөн хориход шилжүүлэхгүй. Учир нь “хүүхдийн хорих” сургалт хүмүүжлийн тусгай байр нэршилтэй болж тусдаа өөр газар байрлах юм байна.  

9.    Хорих анги тус бүр камерийн хүрэлцээ муу байдгаас хоригдол их алдагддаг. Харин төвлөрсөн шоронтой болбол хоригдол оргох байдал давтагдахгүй аж. Одоо баригдаж буй хорих ангийг чанарын хамгийн сайн стандартад, олон давуу талтайгаар барьж байгаа аж.

10.    Шоронгийн шинэчлэлтэй холбоотойгоор шүүхийн байгууллагуудын барилгыг ч мөн шинээр барих юм байна.