Шүүх шинжилгээний  үндэсний хүрээлэнгийн шинжилгээний бүртгэл мэдээллийн хэлтсийн Архив сан хөмрөг хариуцсан мэргэжилтэн, цагдаагийн дэслэгч Н.Бат-Амгаланг өнгөрсөн оны долдугаар сарын 25-нд ажилчдынхаа компьютерт санаатайгаар халдаж мэдээлэл авч олон нийтэд тараасан гэдэг үндэслэлээр удирдлагууд нь цагдаагийн байгууллагад өгсөн байдаг. Энэ дагуу тэрбээр шүүх цагдаа гэж явсаар Сүхбаатар дүүргийн прокуророос гэм буруугүй нь тогтоогдсон талаараа мэдээлж байсан. Улмаар эргэн ажилдаа орох гэтэл аль хэдийнэ оронд нь хүн авч ажлуулж эхэлсэн байгаа. Ингээд тэрбээр өргөдөл, гомдол өгч“ намайг ямар ч буруугүй гээд шүүхээс тогтоогоод өгсөн байтал яагаад ямар ч үндэслэлгүй ажилд маань буцааж авахгүй байгаа юм” гэж хэлсэн ч удирдлагууд нь хүлээж аваагүй байна.

Тэгвэл түүнтэй холбож байгууллага нь эргүүлж ажилд нь авсан эсэх мөн хэрэг нь аль шатандаа явж байгаа талаар асууж тодрууллаа.

Тэрбээр "Өмнөх удаа Сүхбаатарын прокуророос тухайн хэрэгт эрүүгийн хэрэг үүсгэх боломжгүй гэж байсан ч компанийн удирдлагуудаас дахин гомдол өгч шалгуулсан. Улмаар өнгөрсөн сарын 25-нд Прокуророос хэргийг хэрэгсэхгүй болгосон. Тэгэхээр хэргийн тогтоолтой манай байгууллагын удирдлагууд долоо хоногийн дотор танилцаад  хариу мэдэгдэнэ. Гэхдээ тэд дахин миний эсрэг, тогтоолын эсрэг гомдол мэдүүлсэн ч болно. Эсвэл намайг ажил эргүүлэн авахыг ч үгүйсгэхгүй. Нөгөөдөр хариу мэдэгдэх учир хүлээгээд л сууж байна" гэсэн юм.