Улсын Дээд шүүхийн хяналтын шатны эрүүгийн хэргийн шүүх хуралдаанаар Хятадуудаас авлига авсан гэх У.Раднаабазар, Ж.Оюунчимэг нарын 6 хүнд холбогдох эрүүгийн хэргийг ялтнуудын өмгөөлөгч нарын гаргасан гомдлын дагуу өнөөдөр хянан хэлэлцсэн байна.  Улмаар шүүх хурлаар анхан болон давж заалдах шатны шүүхийн шийдвэрийг хэвээр үлдээлээ.

Ж.Оюунчимэг нь Нийгмийн хэв журмыг хамгаалах газрын тусгай хамгаалалтын хэлтсийн тусгай үүргийн цагдаа, ахлах ахлагч У.Раднаабазар, мөн хэлтсийн цагдаа, ахлах ахлагч  Б.Батбаяр, Нийслэлийн Хөдөлгөөнт эргүүлийн газрын 1 дүгээр хэлтсийн хяналт, шалгалтын байцаагч, ахлах дэслэгч Г.Ууганбаяр, Нийслэлийн Хөдөлгөөнт эргүүлийн 3 дугаар хэлтсийн эргүүлийн офицер Д.Энхбаатар, эргүүлийн цагдаа Б.Төгсбаяр нартай урьдчилан үгсэн тохирсны дагуу хяналт шалгалт явуулах нэрээр их хэмжээний хуш модны цайруулсан самрыг ачааны вагонд ачиж байгааг илрүүлэн улмаар Х.Амартүвшингээс 40 сая төгрөгийн буюу онц их хэмжээний хээл хахуулийг авсан гэмт хэргийг үйлджээ. Дээрх мөнгөнөөс Ж.Оюунчимэг 13 сая 500 мянга, У.Раднаабазар 10 сая, Б.Батбаяр 6 сая 500 мянга, Г.Ууганбаяр 3 сая, Д.Энхбаатар, Б.Төгсбаяр нар 3 сая 500 мянган төгрөгийг тус тус хувааж авсан байна.

Нийслэлийн Баянгол дүүргийн шүүх уг хэргийг 2013 оны 10 дугаар сарын 1-ний өдөр анхан шатны журмаар хянан хэлэлцээд Ж.Оюунчимэгт 5 жил 1 сар, У.Раднаабазар, Б.Батбаяр нарт тус бүр 5 жил 1 хоног,  Г.Ууганбаярт 3 жил 6 сар, Д.Энхбаатар, Б.Төгсбаяр нарт 3 жил 5 сар хорих ял тус тус оногдуулжээ.

Нийслэлийн шүүх мөн хэргийг 2013 оны 11 дүгээр сарын 19-ны өдөр давж заалдах шатны журмаар хянан хэлэлцээд анхан шатны шүүхийн шийдвэрийг хэвээр үлдээсэн юм.