“Жаст” группийн захирал асан Ш.Батхүүг хуурамч бичиг баримт бүрдүүлэн уулын баяжуулах “Эрдэнэт” үйлдвэрийг барьцаалан Өмнөд Африкийн “Стандарт” банкнаас их хэмжээний буюу 104 сая ам.доллар залилж, дээрх үйлдвэрт онц их хэмжээний хохирол учруулсан хэрэгт буруутган шалгаж байгаа. Мөрдөн байцаалтын явцад Ш.Батхүү бичиг баримт хуурамчаар үйлдсэн болох нь тогтоогдсон. Түүнийг өнгөрсөн оны наймдугаар сараас хойш ШШГЕГ-ын харьяа цагдан хорих 461 дүгээр ангид саатуулж байгаа юм.

Харин сүүлийн үед  Ш.Батхүүгийн биеийн байдал муудсан тул цагдан хорих 461 дүгээр ангийн эмнэлгээс Нэгдүгээр эмнэлэгт шилжүүлсэн байгаа. Тодруулбал, III шатлалын эмнэлэгт эмчлүүлэх шаардлагатай гэдэг эмчийн дүгнэлт гарсан юм. Тэрээр хамгаалалт дор эмчлүүлж байгаа бөгөөд эмчлэгч эмч, сувилагчаас өөр хүнтэй уулзуулахгүй байгаа талаар бид мэдээлсэн билээ.  Тэгвэл хэргийг шалгаж байгаа мөрдөн байцаагчаас зөвшөөрөл авч хэн нэгэн уулзах боломжтой байгаа аж.  Өөрөөр хэлбэл, гурван цагдаагаар харгалзуулж байгаа Ш.Батхүү хорих ангид үйлчилдэг бусад дүрэм, журмаар эмнэлэгт ялаа эдэлж байгаа ч хэн нэгэн хүсвэл түүнтэй уулзаж болохоор байгаа юм. Гэвч түүн дээр ар гэрийнхнээс нь өөр эргэлт очсон талаарх мэдээлэл хараахан байхгүй байна.

Тэр дундаа түүнтэй хамт хэрэгт холбогдсон Ч.Ганзориг, Д.Сугар нар ч түүнийг эргэж очоогүй байгаа аж.

Тэгвэл энэ бүхэнд гоморхосон Ш.Батхүү хэргээ олон нийтэд зарлаж, задлахаар шийдсэн байна. Тэрбээр хэргээ зарлаж эхэлвэл олон улс төрчдийг хөлдөө чирэх нь ойлгомжтой. Учир нь түүний хэрэгт Ерөнхий сайд асан С.Баяраас эхлээд “Эрдэнэт үйлдвэр”-ийн захирал асан Ч.Ганзориг,  ТӨХ-ны дарга асан Д.Сугар, УБТЗ-ын дарга асан Т.Очирхүү нар ч холбогдод амжсан билээ.

Чухам яагаад хэргийг задлах гэж байгаа талаарх бодит мэдээлэл одоогоор алга. Юутай ч Ш.Батхүүг өнгөрсөн хугацаанд ийн чимээгүй байсныг нь хүмүүс янз бүрээр ойлгож байгаа нь дамжиггүй. Нэг хэсэг нь Ш.Батхүүг хэргийн хамсаатнууд нь ялтгасан гэж үзэж байгаа бол нөгөө хэсэг нь Ш.Батхүүг хэргээ ганцаараа үүр, харин цагаатгах ажилд нь бид оролцоно хэмээн хэлсэн байх хэмээн таамаг дэвшүүлцгээж байна.

Хэрэв Ш.Батхүү хэргээ задалж, үнэн мөнийг илчиж эхэлвэл нэлээн том дуулиан болно. Тэгвэл одоо хүртэл батлан даалтад гарч чадахгүй байгаа мөн томоохон албан тушаалтнуудын нэр холбогдоод буй уг хэргийг олон нийт анхааралтай ажиглаж байна.