Өнгөрч буй онд уулын баяжуулах “Эрдэнэт” үйлдвэрийн Монголын талын 51 хувийг төрийн өмчит “Эрдэнэс МГЛ” компанийн мэдэлд шилжүүлсэн юм. Гэхдээ энэ талаар олон нийтэд мэдээлэлгүй чимээгүй өнгөрсөн. Яагаад ийм чухал асуудлыг олон нийтэд мэдээлэлгүй өнгөрсөн бэ гэдэг асуудал анхаарал татаж эхэллээ.

    Эх сурвалжийн мэдээлж байгаагаар бол монголчууд 51 хувийн эрх мэдлээ өөр газарт ийнхүү шилжүүлсэнд Оросын талынхан сэтгэл өндөр байгаа аж.

Хамгийн хачирхалтай нь манай тал 51 хувийн эрх мэдлээ “Эрдэнэс МГЛ”-д шилжүүлсэн нь Орос-Монголын Засгийн газрын хэлэлцээрийг зөрчсөнийг тун цөөхөн хүмүүс мэдэж байгаа гэнэ. Ийм зөрчил байгааг ч орос ах нар сайн мэджээ. Тэгсэн мөртлөө асуудлыг нууцлаад чимээгүй байгаагийн цаана ямар сонирхол нуугдаж байна вэ гэдэг анхаарал татаж эхэллээ.

    Мэдээж эрх зүйн зөрчилтэй ийм асуудлыг орос “ах” нар чимээгүй өнгөрөөхгүй л дээ. Ямар нэгэн эрх ашиг сонирхол “чимээгүй” байгаагийнх нь цаана нуугдах нь ойлгомжтой.

    Өөр нэгэн эх сурвалжийн мэдээлж байгаагаар бол оросууд энэ зөрчилийг ашиглаад Асгатын ордыг наймаалцах талаар хэлэлцээр эхлүүлсэн гэж тайлбарлав. Хэрэв үнэн бол Н.Алтанхуягийн Засгийн газар хоёр улсын хэлэлцээрийг зөрчсөнийг ашиглаад оросууд Асгатын мөнгөний ордод хамтарсан аж ахуйн нэгж байгуулах сонирхолоо бодитойгоор хэрэгжүүлэхээр шийджээ. Тийм учраас л орос “ах” нар гэрээ зөрчсөн Засгийн газрын шийдвэрийг нүдээ аньж өнгөрөөхийн зэрэгцээ хэрэгтэй үед ашиглах “зэвсэг” болгох стратеги боловсруулсан бололтой.

    Уулын баяжуулах “Эрдэнэт” үйлдвэрийн 51 хувийн эрх мэдлийг “Эрдэнэс МГЛ”-д шилжүүлсэн нь зарим хүмүүсийн хувьд нэг их ач холбогдолтой биш. Харин зарим хүмүүсийн хувьд туйлын их ач холбогдолтой. Өөрөөр хэлбэл “Эрдэнэт” үйлдвэр шууд “Эрдэнэс МГЛ”-ээс хараатай болно гэсэн үг л дээ. “Эрдэнэс МГЛ”-ийг Увс аймгийнхан удирдаж байгаа. Тэгэхээр увсынхан “Эрдэнэт” үйлдвэрт гар хөлөө лав гэгч нь шургуулж, бодлогыг тодорхойлоход нь оролцоно гэсэн үг.

    Мөн “Эрдэнэт”-ийг ийнхүү шилжүүлсэний цаана өөр олон бодлого, зорилго байгаа нь гарцаагүй. Энэ бүхэн одоохондоо нууцаас гадна асуултын тэмдэг хэвээрээ байна.