"УИХ-ын гишүүдийг "төгөлдөр хуур тоглох"-ыг хориглоё" гэсэн хачирхалтай үг өнөөдрийн УИХ-ын чуулганы онцлох үг байлаа. Гэхдээ энэ бол Манай Ерөнхийлөгч Ц.Элбэгдорж рок, попын ододтой хамтарч "Аяны шувууд"-ыг дуулж, төгөлдөр хуур тоглосон үйлдлээс огт өөр утгатай юм. Олон жил яригдаж, улиг болоод буй ажилдаа ирээгүй нэгнийхээ өмнөөс кноп дарж, санал өгөхийг манай гишүүдийн ийнхүү "төгөлдөр хуур тоглох", "төгөлдөр хуурдах" гэж нэрлэдэг аж. Өнөөдөр хурууны хээгээр ирц бүртгэх асуудлыг хэлэлцэх үеэр УИХ-ын гишүүн Д.Лүндээжанцан "Ингэж төгөлдөр хуурддагаа больё" гэж хэлэхэд бүх гишүүд дуу нэгтэйгээр толгой дохиж байсныг бодвол энэ үгийг нийтээрээ хэрэглэдэг бололтой. Харин А.Бакей гишүүн л "төгөлдөр хуурдах" гэдгийг "хуйрдах" гэж хэлээд баахан шоолуулж авлаа. Нээрээ манай гишүүд бусдын саналыг хулгайлж "төгөлдөр хуурдаж" байхаар жинхэнээсээ төгөлдөр хуур тоглож сураасай. Баяраар, сонгуулиар шоудах юмтай, иргэд ч боловсролтой хүмүүс гээд ам сайтай байх ч юм бил үү.