Шинэчлэлийн Засгийн газрын яамдаас хэл амнаас хоолуур байж, хамгийн чимээ шуугиан багатай байдаг нь Батлан хамгаалах яам. Харин энэ яам албан тушаалаа урвуулан ашигласан хэрэгтэй холбоотойгоор багагүй доргиж эхэллээ. Учир нь Налайх дүүрэгт байдаг, тус яамны харьяаны цэрэг хангалтын зориулалтаар хэрэглэдэг төмөр зам гэнэт нэгэн хувийн компаний өмч болчихжээ. Тодруулбал, 1970-аад оны сүүлчээр орос “ах” нарын хөрөнгөөр барьсан, Нисэхийн ангиудыг бараагаар хангадаг байсан төмөр замыг тус яамны эрх мэдэлтэн “Металл опт” гэх компанид худалдсан байна. Харин хэн, яагаад худалдав? гэдэг Батлан хамгаалах яамны дарга нарын дунд “дайн”-ы гал өрджээ.

    Энэ стратегийн төмөр зам нь Налайхын төмөр замаас цааш 6,5 км үргэлжилдэг. Өнөөдөр нэг км төмөр зам тавихад 1,8 тэрбум төгрөг шаардлагатай гэж үзэж буй. Гэтэл хамгийн багадаа 3 тэрбум төгрөгөөр үнэлэгдэхээр байгаа тус төмөр замыг  “Металл опт” компани ердөө 25 сая төгрөгөөр худалдаж авсан байх юм. “Металл опт” компанийхан энэ наймаагаа хууль ёсны дагуу хийсэн хэмээн мэдэгдэж байгаа аж. Харин наймаанд оролцоогүй дарга нар нь “Яахаараа улсын стратегийн ач холбогдолтой төмөр замыг ийм хямдхан, бас зөвшөөрөлгүй зардаг байна?” хэмээн нэлээн асуудал босгож иржээ. Уг нь энэ долоо хоногт Батлан хамгаалах яамны удирдах зөвлөл хуралдах байсан ч “Металл опт”-той хийсэн наймаанаас болж хоорондоо муудалцан хурлаа хойшлуулсан байна. Тэд төрийн албан хаагчид, яамны ажилтнууд хоорондоо зодолдох болсон “марафон”-ыг бараг л үргэлжлүүлэх шахжээ.

    Ам чангатай тус яамныхан энэ талаар гадагш мэдээлэл гаргахгүй байгаа ч төмөр замыг зарах гэрээг гардан гүйцэтгэсэн эрх мэдэлтэн, түүний хамсаатнуудыг албан тушаалаа урвуулан ашигласан гэж АТГ-аар шалгуулахаар болж байгаа гэх мэдээллийг эх сурвалж өглөө. Мөн Монголын батлан хамгаалахын салбарын стратегийн ач холбогдолтой гэж үздэг төмөр замыг яагаад зөвшөөрөлгүй хувьд шилжүүлсэн бэ? гэдгийг тодруулахаар ТЕГ-т хандах сураг ч  мэр, сэр дуулдаж эхэллээ. Үүний хажуугаар энэ наймаанд Батлан хамгаалахын сайд Д.Бат-Эрдэнэ өөрөө холбоотой юу гэсэн хардлага тарж эхлээд байгаа аж. Гэхдээ сайд Д.Бат-Эрдэнэ уг асуудалд өөрөө багагүй анхаарал хандуулж байгаа гэх.

    Энэ Налайх дахь хэсэг төмөр замыг 1990 оноос хойш ашиглаагүй. БХЯ, ЗХЖШ-ын өмчид бүртгэлтэй байсан байна. Энэ хугацаанд Зэвсэгт хүчний хангалтын анги уг төмөр замыг хариуцаж байсан бөгөөд сүүлийн нэг жилд ангийн захирагч нь хоёр удаа солигдсон аж. Ийнхүү олны хараанаас далд байсан улсын өмч нэг л өдөр хувийн компанид шилжсэн нь саяхан ил болжээ. Одоо чухам хэн, ямар эрх мэдэлтэн яамны зөвшөөрөлгүй уг наймааг хийж чадав? гэдэг онцлох асуулт болоод байна.