УИХ-ын чуулганы үдээс өмнөх хуралдаанаар Гаалийн албан татвараас чөлөөлөх тухай, Нэмэгдсэн өртгийн албан татвараас чөлөөлөх тухай хуулийн төслүүд Хүнсний улирлын нөөц бүрдүүлэхэд шаардагдах 100.0 мянга хүртэл тонн улаан буудайг импортоор оруулахад, анхны хэлэлцүүлэгийг хийлээ. Хуулийн төсөлд тусгаснаар нөөц бүрдүүлэх зорилгоор 100 мянган тонн хүртэл улаан буудайг импортоор оруулж ирэхэд Гааль болон НӨАТ-аас чөлөөлнө гэж үзэж байна. Улаан буудайг татвараас чөлөөлөх хугацаа ирэх зургадугаар сарын 1-н хүртэл хамаарна. МАН-ын бүлгийн зүгээс гаднаас улаан буудайг их хэмжээний мөнгөөр авах гэж байна хэмээн шүүмжилж байгаа. Харин Үйлдвэр хөдөө аж ахуйн сайд Х.Баттулга Төрөөс мөнгө гаргахгүй, гурилын үйлдвэрүүд хөрөнгө гаргаж улаан буудай оруулж ирнэ гэсэн тайлбарыг өглөө.

Хэлэлцүүлгийн шатанд УИХ дахь МАН-ын бүлгийн гишүүд тооцоо хийгээд үзэхээр 100 мянга хүртэл тонн улаан буудай импортоор оруулж ирэх шаардлагагүй, 40 мянган тонн байхад болно. Хэрэв 100 мянган тонн хүртэл улаан буудай импортлох юм бол эргээд энэ нь үндэсний тариаланчдын ургац хураалтад сөрөг нөлөө үзүүлж, эргээд Монгол Улс стратегийн чухал бүтээгдэхүүнээ импортоор хангахаас аргагүйд хүрч болзошгүй гэж үзэж байна. Тийм учраас эхлээд бодлогоо зөв тодорхойлох ёстой гэх байр суурь баримталсан юм.

Үйлдвэр хөдөө аж ахуйн сайд Х.Баттулга “Газар тарилангийн салбар уначихаад арга ядаад улаан буудай импортлохоос аргагүйд хүрсэн гэх буруу ойлголт өгч боломгүй байна.  Намрын ургац хүртэл гурилын үнэ өсөхөөс сэргийлж, улаан буудай импортолж нөөцлөх гэж байна. Төрөөс нэг ч төгрөг гарахгүй, гурилын үйлдвэрүүд өөрсдөө хөрөнгөө гаргаад улаан буудай оруулж ирнэ. Атрын гуравдугаар аян үр дүнгээ өгсөн гэдэгтэй санал нэгдэнэ. Энэ бодлогыг үргэлжлүүлэхийн тулд яамны зүгээс ойрын хугацаанд үрийн шинэчлэл, газрын шинэчлэл, техникийн шинэчлэлийн талаарх бодлогоо ойрын хугацаанд УИХ-д оруулж ирж батлуулна” гэлээ.

УИХ-ын Байгаль орчин, хүнс хөдөө аж ахуйн байнгын хорооны дарга Г.Баярсайхан “2008-2013 оны хооронд хүнсний хэрэгцээ нэмэгдсэн. Хүн нэмбэл хүнс нэмнэ гэдэг. Ардын намынхан стратегийн чухал бүтээгдэхүүнээр улстөр хийхгүй шүү. Атрын гуравдугаар аян үр дүнгээ өгсөн, салбар хариуцсан яам нь алдаа гаргасан нь үнэн. Буудайн тариалалт багассан нь үнэн, бидний зүгээс яаманд ургац алдаж болохгүй шүү гэж анхааруулдаг байсан. Байнгын хорооны зүгээс газар тариалангийн салбарт баримтлах бодлогыг оруулж ир гэдэг шаардлагыг тавьж байгаа. Раапс тариалалтын талбай нэмэгдсэн. Бодлогоор тариалалтын талбайг тогтоох ёстой” гэсэн юм.

Харин УИХ-ын гишүүн С.Бямбацогт Г.Баярсайханд гишүүнд хандан “Ардын намын бүлэг улаан буудайн асуудлыг улстөржүүлсэн юм байхгүй. Тавих ёстой асуудлаа л тавьсан. Бодлого алдагдсан учраас эргэж нэг харъя, алдаагаа засъя гэдэг үүднээс ярьж байгаа. Гурилын үнийг хатуу барихын тулд улаан буудайг хэтэрхий бага үнээр авах, үүнээсээ болод тариаланчид улаан буудай биш раапс тариалсан,өнгөрсөн онд. Монгол Улс 2007 онд 100 мянган га талбайд улаан буудай тариалж байсан бол Атар газар эзэмших гуравдугаар аяны хүрээнд 480 мянган га хүртэл улаан буудайн тариалалт өссөн. Гэтэл эргээд 100 мянган га хүртэл раапс тариалж, улаан буудай импортлох тухай яриад сууж байгаа нь олсон ололтоосоо ухарсан хэрэг.  2012 онд 420 мянган тонн улаан буудай хурааж байсан бол 2013 онд 329 мянган тонн болж ургацын хэмжээ буурсан. Энэ бол төрийн бодлогын хэмжээнд алдаа гарчихаад байна гэсэн үг. Тийм учраас хуулийн төслийг хэлэлцэх үеэр таваарын буудай байх уу, үрийн буудай байх уу гэдгээ тодорхойлох ёстой байсан. Манай бодол ийм байр суурьтай байна” гэсэн юм.

Ингээд Гаалийн албан татвараас чөлөөлөх тухай, Нэмэгдсэн өртгийн албан татвараас чөлөөлөх тухай хуулийн төслүүдийн анхны хэлэлцүүлгийг хийж, зарчмын зөрүүтэй саналын томъёоллоор санал хураалган эцсийн хэлэлцүүлэгт бэлтгүүлэхээр холбогдох байнгын хороонд шилжүүлэв.