Өнгөрсөн долоо хоногт МАН-ын хэд хэдэн төрийн бус байгууллагууд тэргүүнээ солихоор хуралдсан тухай мэдээлэл түгсэн. Ямар ч байсан НАМЭХ-ны ерөнхийлөгч Д.Оюунхорол ажлаа өгнө гэдгээ албан ёсоор мэдэгдсэн байна. Тэгээд дараагийн удирдлагад нь Нийслэлийн Засаг даргын орлогч асан Ц.Цогзолмаа, “Бишрэлт” группын ерөнхийлөгч, дэд сайд асан Б.Ундармаа хоёрыг дэвшүүлэхээр тохиролцжээ. Ингээд энэ хоёр эрхэм ирэх сард болох МАН-ын Эмэгтэйчүүдийн байгууллагын их хурлаар хэн нэгэн нь тэргүүн болох аж. Ажиглагчдын үзэж байгаагаар бол МАН-ын одоогийн удирдлага, хотын бүлэг нийслэлийн орлогч байсан Ц.Цогзолмаагаа дэмжих нь гарцаагүй аж. Харин Б.Ундармааг хөдөө орон нутгийнхан, намынхаа нэр хүндэд санаа зовогсод илүүтэйгээр дэмжих бололтой. Ийнхүү НАМЭХ-ны тэргүүний төлөө нэг нь дарга нарын дэмжлэгтэй, нөгөө нь массын дэмжлэгтэй хоёр эмэгтэй шалгарч үлджээ. Сонирхолтой нь Ц.Цогзолмаа, Б.Ундармаа хоёулаа Ховд аймгийнх юм.