N энтертайментийн бүтээл "Бага хаадын үе" түүхэн сэдэвт олон ангит кино энэ сарын 20-оос үзэгчдийн хүртээл болно.

"Бага хаадын үе" хорин ангит кино 500 орчим хүний хөлс, хөдөлмөрөөр бүтсэн бөгөөд одоохондоо киног аль сувгаар гаргахыг нууцалж байгаа юм байна.

Кинонд АЖ А.Энхтайван Чингис хааны дүрд, АЖ Н.Сувд Мандухай хатны дүрд тоголж байгаагаас гадна найман аймгийн театрын жүжигчид оролцон тоглосон гэнэ.

Зохиолч, продюсер Ален Арман энэхүү бүтээлээ долоон жилийн турш бичихдээ, 200 гаруй эр сурвалж, ном судар шагайсан гэдэг бөгөөд  тэрээр “Бид түүхэнд байсан үгүй нь мэдэгдэхгүй, Солонгосын нэг тогооч хүүхний нэрийг байтугай амьдралыг нь хөгшин, залуугүй түүх мэт мэддэг атлаа, бүхэл бүтэн Монголынхоо 22 хааны нэрийг ч бүтэн мэддэггүй байсныг сэргээн сануулахыг хичээлээ. Монголын түүхийн цагаан толбо болсон энэ үеийг уран сайхны аргаар бүтээхдээ алдсан будилсан зүйлс байж магад. Шүүмжилж эсэргүүцэх нөхдүүд ч зөндөө гарах биз. Хамгийн гол нь ачааны хүндийг анхдагч нь үүрдэг жамыг ухаарч, үүнээс хойш манай залуучууд ийм төрлийн түүхэн сэдэвттэй кино, сериалууд олныг бүтээх санаа, гарц, урам болохын учир бидэнд буй" хэмээн зохиолынхоо эхэнд дурьджээ.

Тус киноны гол санаа нь Монголчуудын эв нэгдэлгүй, эрх мэдэл, эд хөрөнгөнөөс болж сарниж бутарч, доройтсон гашуун түүхийг сануулахын зэрэгцээ өнөөдөр гадаадын олон ангит кинонд тархиа угаалгасан монголчууддаа өөрсдийнх нь асар их түүхийн хэлтэрхийг дамжуулан хүргэхэд оршино.

Дашрамд сонирхуулахад Тогоонтөмөр хаан Хятадаас хөөгдөн ирснээс Лигдэн хутагтыг таалал төгсөх хүртэл хаан ор залгасан 22 хаадын үеийг Монголын түүхнээ Бага хаадын үе хэмээн тэмдэглэсэн байдаг.