Португалийн шигшээ, Испанийн “Реал Мадрид” багийн довтлогч Криштиан Роналду ФИФА-гийн оны шилдэг хөлбөмбөгчнөөр тодорч “Алтан бөмбөг”-ийн эзэн болсон. Энэ талаарх мэдээ дэлхий даяар шуугиж, одоо ч чимээ нь намжаагүй байна. 

Криштиан Роналду шагнал авсан нь Монголын олон шүтэн бишрэгчдийг нь баярлуулсан бололтой. Ерөнхийлөгч л гэхэд өнөөдөр өөрийн цахим хуудсаар дамжуулан Криштиан Роналдугийн тууштай чанарыг үлгэрлэхийг залууст захиад авлаа.

Тэрбээр "Бусдын амжилтыг хараад баярлах нь хүний ёс. Криштиан Роналду дэлхийн шилдэг хөл бөмбөгч боллоо. Энэ спортыг шүтэн бишрэгч олон хүнийг баярлуулав. Хүн зүтгэвэл, тууштай байвал хүрч болохгүй амжилт гэж үгүй. Тогооч ээж, цэцэрлэгч аавын энэ хүү ахиад алтан бөмбөг атгалаа. Ээжийг нь баярлаж мэлмэрэхийг, Роналдуг үг хэлэхийг хараад аньсага чийгтэж л суулаа. Уулын оргилыг, усны гүнийг, ажлын хүндийг, амжилтын хэцүүг сонгоцгоо" хэмээн санал, бодлоо илэрхийлэв.