ССАЖЯ-ныхан оны өмнөхөн хоёр хүний шагналыг андуурч өгснөөс болж нэлээд шүүмжлэлд өртсөн. Тодруулбал улсад 40 жил ажилласан балетийн нэгэн ахмад багшийг “Алтан гадас” одонгоор шагначихаад “Шагналаа андуураад өгчихсөн байна. Буцааж авна” гээд загнаж шагналаа буцаан авсан  гэдэг. Шагналаа “хураалгасан” балетчины шавь нар энэ асуудлыг ССАЖЯ-нд тавьсан ч “Шинэ жилийн арга хэмжээтэй гээд халгаагаагүй” гэдэг. Тэгвэл уг будлиантай асуудлыг тус яамны сайд Ц.Оюунгэрэл өөрийн биеэр шийджээ.

Ц.Оюунгэрэл сайд энэ талаар “Тухайн үед ижилхэн нэртэй хоёр хүн яг адилхан шагналаар нэг өдөр шагнуулсан юм. Нэг нь нөгөөгөө бодвол арай ахмад хүн байсан. Намайг Төрийн ордонд ажилтай байх хойгуур манай яаман дээр тэдний шагналыг нь гардуулахдаа солиод өгчихсөн байсан. Шагнуулсан хоёр хүний нэг нь овог нь солигдчихож гэж бодоод бидэнтэй эргэж холбогдоод асуудлыг зохицуулах гэж байгаад манай яамны ажилтан ахмад настай хүнд шагналыг нь андуурч өгсөн мэт ойлголт төрүүлж, гомдоосон харамсалтай хэрэг гарсан. Хариуцлага алдсан тухайн ажилтанд анхааруулга өгч, сануулах арга хэмжээ авсан. Гомдоосон хүнээ шинэ жилээс өмнө яаман дээрээ урьж авчраад би өөрийн гараар шагналыг нь гардуулж, уучлалт гуйсан байгаа” гэсэн тайлбарыг өглөө.