Хөгжлийн бодлого, төлөвлөлтийг боловсронгуй болгох УИХ-ын тогтоолын төслийг бүх байнгын хорооны хуралдаанаар хэлэлцэх үүргийг УИХ-ын дарга өнгөрөгч баасан гаригт өгсөн билээ. Энэ дагуу тогтоолын төслийг энэ долоо хоногт бүх байнгын хороогоор хэлэлцэж эхлээд байгаа юм. Өчигдөр Нийгмийн бодлого, боловсрол, соёл, шинжлэх ухааны байнгын хорооны хуралдаанаар уг асуудлыг хэлэлцэхэд холбогдох яамдын төлөөлөл хангалттай ирээгүй гэсэн шалтгаанаар дараагийн хуралдаанаар хэлэлцүүлэхээр тогтлоо. Учир нь хуралдаанд ганц хоёрхон яамны л холбогдох албан тушаалтнууд ирсэн байлаа. Өөрөөр хэлбэл, яамд болон байнгын хороонд харьяалагддаг гишүүдийн саналыг авч санал дүгнэлт гаргасны дараа тогтоолын төслийг хэлэлцэх юм байна. Санал дүгнэлт боловсруулах ажлын хэсгийг С.Ганбаатар гишүүн ахлах ажээ.Тогтоолын төслийн талаар УИХ-ын гишүүн А.Бакей "Тухайн байнгын хорооны эрхлэх асуудлын хүрээнд одоо мөрдөгдөж байгаа ямар хөтөлбөр байна, түүний хэрэгжилт ямар төвшинд байгааг дүгнэж, цаашдаа бодлогын баримт бичгээ яаж тодорхойлох вэ гэдэг чиглэлээр байнгын хороо бүр санал дүгнэлтээ гаргах ёстой. Нийгмийн бодлого, соёл, шинжлэх ухааны байнгын хорооны хувьд эрүүл мэнд, боловсрол, шинжлэх ухааны салбарт хэрэгжиж байгаа бодлогын баримт бичгүүдийн хэрэгжилтэд үнэлэлт дүгнэлт өгч, санал дүгнэлт гаргана. Энэ санал дүгнэлтийг Төрийн байгуулалтын байнгын хороо хүлээн авч, бүх байнгын хорооны санал дүгнэлтийг нэгтгэж, Мянганы хөгжлийн зорилтод суурилсан үндэсний хөгжлийн цогц бодлогыг шинэчилж найруулах байдлаар өөрчлөх хандлагатай байгаа" гэв. Харин Ё.Отгонбаяр гишүүн "Байнгын хорооны эрхлэх асуудлын хүрээнд гол зарчмын асуудлаар улс төрийн хүчнүүд зөвшилцөнө гэж миний хувьд ойлгосон. Жишээ нь, нийгмийн халамж, хамгааллын асуудлыг хэлж болно. Нэг хэсэг нь хавтгайрсан халамж гэж нэрлэдэг. Нөгөө хэсэг нь бүх хүүхдэд 20 мянган төгрөг өгдөг хэрнээ ахмадууд, хөгжлийн бэрхшээлтэй иргэдэд өгөхгүй байна гэж шүүмжилдэг. Тиймээс иймэрхүү асуудлаар намууд ойлголцож, зарчмаа тохиролцвол яасан юм бэ. Яг үүн шиг боловсрол, шинжлэх ухааны салбарт ч нэг мөр ойлгох асуудлууд олон бий. Бакей даргын хэлсэн шиг батлагдсан олон хөтөлбөрийг дүгнэсний дараа санал гаргана гэвэл олон сар сунжирна. Тогтоолын хэрэгжилт хаана ч байгаа нь мэдэгдэхгүй живээд алга болчиж магадгүй гэж болгоомжлоод байна. Тэгэхээр энэ хоёр саналыг хамтад нь явуулах ёстой гэж үзэж байна" гэлээ.
УИХ дахь МАН-ын бүлгийн дарга С.Бямбацогт "Нийгмийн бодлого, боловсрол, соёл, шинжлэх ухааны байнгын хороо бол хамгийн олон яам, агентлагийг хамаардаг байнгын хороо. Гэтэл энд ганц хоёрхон яамны төлөөлөл сууж байна. Улс орны хөгжлийн бодлоготой холбоотой чухал асуудлыг хэлэлцэж байхад яагаад оролцдоггүй юм. Энэ талаар цаашдаа байнгын хорооны дарга, ажлын албанаас анхаарч ажиллая. Ардын намаас тав, АН-аас хоёр, эвслээс нэг, нэг бие даагч л энэ хуралдаанд сууж байна. Ийм байдлаар хурал зохион байгуулж болохгүй байх аа" гэв. Түүний саналыг хүлээж авч байгаагаа байнгын хорооны дарга Д.Батцогт хэлж байсан юм.
Л.Энх-Амгалан гишүүний хувьд "Өнгөрсөн жил бүх байнгын хорооноос 2016 он хүртэл ямар хууль тогтоомж батлуулах вэ гэдэг санал авсан. Гэтэл байнгын хороодын гаргасан саналаас огт өөр тусдаа жагсаалтыг Засгийн газар гаргасан байсныг гишүүд санаж байгаа байх аа. Тэгэхээр хөгжлийн бодлого, төлөвлөлтөө дэмжсэн ямар эрх зүйн хууль эрх зүйн актууд тухайн дөрвөн жилд батлагдах ёстой вэ гэдгийг УИХ-ын тогтоолын төсөлд тусгая" гэсэн саналтай байв. Тиймээс байнгын хорооны дарга Д.Батцогт "Олон яам хариуцдаг байнгын хороо учраас энэ асуудлыг бэлтгэл хангагдсаны дараа хэлэлцүүлье. Салбарын яамд, байнгын хорооны гишүүдийн саналыг нэгтгэж, дараагийн хуралд санал боловсруулж оруулж ирэх үүрэг бүхий ажлын хэсгийг байгуулъя" гэснээр хуралдаан өндөрлөлөө.
