Сар шинийн өмнө засгийн газраар Үндэсний баяр наадам зохион байгуулах хорооноос оруулж ирсэн асуудлыг хэлэлцэж өвлийн уралдаануудыг явуулахгүй байх шийдвэрийг албан ёсоор гаргасан. Учир нь өвлийн улирал морьдоос гадна хурдан морь унаач хүүхдүүдэд хамгийн их эрсдэлтэй байдаг. Гар хөлөө хөлдөөж, хайруулах наад захын асуудал. Цаашилбал хөлдүү газар унаж бэртэж гэмтэх, амь насаа алдах тохиолдол ч элбэг. Тийм ч учраас засгийн газар уг шийдвэрийг гаргасан биз.

        Гэтэл тавьсан хоригийг үл тоож хаврын улиралд зохиогддог хурдан морины уралдаанууд эхлэсэн байна. Өнгөрсөн битүүний өдөр Өвөрхангай аймгийн Хужирт суманд их сунгаа болж, энэ үеэр 10 настай унаач хүүхэд морьтойгоо дайруулж, хүнд бэртэл авчээ. Нэгэн уяач өөрийн морийг таслаж авах гэж байгаад унаач хүүг морьтой нь хамт дайрч гэмтээсэн гэдгийг эх сурвалжууд мэдээллэж байна. Хүүгийн биеийн байдал тун хүнд байгаа бөгөөд эмч нарын хэлж буйгаар тархинд нь цус харвасан байх магадлалтай гэнэ.

       Төр засгаас унаач хүүхдүүдийн амь насыг хамгаалах гэж өвлийн уралдааны цуцалсан. Гэтэл нөгөө талд нь аймаг, сумдын том толгойтой “Хурган дарга” нар янз бүрийн цолны найр, өндөр бооцоот уралдаан, их, бага, дунд сунгаа гэгчийг дур мэдэж зохион байгуулсаар сууна. Үүнийх нь үр дүнд гэмгүй нялх үрс гэмтэж бэртэх бүр цаашилбал амь насаараа хохирох байдал үүсээд байгааг анхааралдаа авах нь зүйтэй. Засгийн газар, Үндэсний баяр наадам зохион байгуулах хорооны шийдвэрийг үл тоодог эрх мэдэл нь хэтэрсэн засаг дарга нарынхаа толгойг цаашид үргэлжлүүлж илсээр байх хэрэг үү. Төр засаг гэж байгаа бол энэ мэт засгийн газрын шийдвэрээсээ давж замбараагүй зугаацаж, цэнгэдэг “Хурган дарга” нартай хэн хариулт тооцох вэ? Тэднийг чимээгүй харж суусаар байтал хүний нялх үрсийн амь нас дээсэн дөрөөнд дэнжигнэсээр л... Түүгээр ч үл барам хэдхэн хоногийн дараа буюу энэ сарын 10 –нд “Өндөр бооцоот” уралдаан гэгч Цагаан хөтөлд болох зар нь тараагдаж байна. Мөн “Дүнжингарав” -ын хурд өвлийн морин уралдааны сунгаа болохоор товлогдсон. Энэ мэт үйлдлийг таслан зогсоож чадахгүй байгаа ММСУХ ажлаа хийж чадахгүй байгаа гэсэн дүгнэлтэнд шууд хүрч байна. Эдгээрт дахиад хэдэн хүүхдийн гар, хуруу хайрагдаж, хэд нь гэмтэж бэртэх бол гэхээс сэтгэл эмзэглэмээр. Даширамд дуулгахад өнгөрсөн 2013 онд гэхэд л нийт 958 унаач хүүхэд мориноос унаж, 16 хүүхэд хөнгөн гэмтэж, 34 хүүхэд хүнд гэмтэж, зургаан хүүхэд эндсэн гэсэн албан ёсны тоо баримт тэмдэглэгдэн үлджээ.