Хоёр жил тутамд зохиогддог “Олон улсын морин хуурын наадам”-ын бүртгэл эхэллээ.

Наадмын хүрээнд Олон улсын морин хуурчдын уралдаан, симпозиумыг сөөлжин явуулдаг бөгөөд 2008, 2012 онд наадам-симпозиум, 2010 онд уралдаан болсон. Өнгөрсөн хугацаанд энэхүү наадамд ОХУ, БНХАУ, Япон, АНУ, БНСУ, ХБНГУ, Францын 600 гаруй судлаач, урлаач, хуурч оролцжээ.

Монгол түмний соёлын өв морин хуурыг түгээн дэлгэрүүлэх, хуурдах уламжлалт арга барилыг хадгалах зорилготой наадам энэ удаа хоёр шаттайгаар ирэх дөрөвдүгээр сарын 27-29-нд Улсын филармонид болох юм.

Наадмын бүртгэл ирэх дөрөвдүгээр сарын 20-ныг хүртэл үргэлжлэх бөгөөд наадамд оролцогчдын тоо, насанд хязгаар тавиагүйн дээр морин хуур сонирхогчдоос эхлээд мэргэжлийн хөгжимчид ч оролцох боломжтой гэнэ. Оролцохыг хүсэгчид “Эгшиглэн” хөгжмийн зэмсгийн дэлгүүрийн байранд очиж бүртгүүлэхээс гадна j.uugankhuur@gmail.com хаягаар холбоо барьж болох аж.